ناعىز ماحاببات: جاپونيانىڭ حانشايىمى قاراپايىم كەڭسە قىزمەتكەرىنە تۇرمىسقا شىقتى

 استانا. قازاقپارات - جاپونيا يمپەراتورى اكيحيتونىڭ نەمەرە قارىنداسى اياكو حانشايىم قاراپايىم جىگىتكە تۇرمىسقا شىقتى.

ونىڭ تاڭداۋى تۇسكەن ازامات جاپونيالىق كومپانيالاردىڭ بىرىندە زەرتتەۋشى بولىپ جۇمىس ىستەيدى.

بۇل تۋرالى The Mainichi باسىلىمىنا سىلتەمە جاساپ Stan.kz حابارلايدى.

نەكە ءراسىمى توكيوداعى «مەيدزي» سينتويستىك حرامىندا ءوتتى. عاشىقتاردىڭ نەكە قيۋ سالتاناتىندا تۋىستارى مەن دوستارىنان قۇرالعان 30 ادام قوناق بولدى. ۇيلەنۋ تويى كەزىندە ورتا عاسىرلىق جانە زاماناۋي داستۇرلەر قاتار كورىنىس تاپتى. نەكە سالتاناتىندا سينتويستىك راسىمدەر جاسالعانىمەن، جاس جۇبايلار نەكە جۇزىگىمەن الماستى.

ۇيلەنۋ تويىندا اياكو حانشايىم حەيان (794- 1185 ج.ج) داۋىرىندەگىدەي كيىنىپ كەلدى. ونىڭ ۇستىندە ءداستۇرلى كويلەك بولدى. سونىمەن قاتار بويجەتكەن ءداستۇرلى شاش ۇلگىسىن جاساتقان. ال كۇيەۋ جىگىت زاماناۋي كيىنگەن. موريانىڭ ۇستىندە ەۋروپالىق كيىم بولدى.

اياكو قاراپايىم ازاماتقا تۇرمسىقا شىققاندىقتان، ول يمپەراتور وتباسىنىڭ مۇشەسى مارتەبەسىنەن ايىرىلادى. الايدا ول ءوزىنىڭ كەي قىزمەتىن اتقارۋدى جالعاستىرادى.

مىسالى جاپونياداعى ەكى قوعامدىق ۇيىمنىڭ ءبىرىن باسقارا بەرەتىن بولادى. ال حانشايىمنىڭ كۇيەۋى جاپونياداعى ءىرى كولىك كومپانيالارىنىڭ ءبىرى Nippon Yusen كومپانياسىندا زەرتتەۋشى بولىپ جۇمىس ىستەيدى.

اياكونىڭ جاساۋى رەتىندە كۇيەۋ جىگىتتىڭ وتباسىنا مەملەكەتتىك قازىنادان شامامەن 950 مىڭ دوللار (350 ميلليون تەڭگەدەن اسا) بەرىلدى.