مارس ۇستىندەگى بۇلت - بۇلت ەمەس، سۋ بۋى بولىپ شىقتى

 استانا. قازاقپارات -ءبىر ايدان استام ۋاقىت بويى ەۋروپا عارىش اگەنتتىگىنىڭ عارىشتىق اپپاراتى قىزىل پلانەتانىڭ ۇستىندە ورنالاسقان شۇڭقىر سياقتى ءبىرتۇرلى بۇلتتى بايقاپ، زەرتتەپ كەلدى.

 عالىمداردىڭ ايتۋى بويىنشا، بۇلتتىڭ ورنالاسۋى 13 - قىركۇيەكتەن بەرى وزگەرمەگەن -  ول پلانەتانىڭ ەكۆاتورىنا جاقىن (مارس ەكۆاتورىندا تەمپەراتۋرا 20 گرادۋسقا دەيىن جىلى بولادى) ارسيا تاۋىنىڭ (بۇرىنعى جانارتاۋ) جوعارعى جاعىندا ورنالاسقان. الايدا، ە ع ا زەرتتەۋشىلەرى اتاپ وتكەندەي، بۇل جاي عانا سايكەستىك. بۇلتتىڭ پايدا بولۋ سەبەبى جانارتاۋدىڭ ويانۋى ەمەس، ويتكەنى ەۋروپالىق عالىمداردىڭ پىكىرى بويىنشا ارسيا ۆۋلكانى 50 ميلليون جىل بۇرىن سونگەن جانە قايتا ويانۋى مۇمكىن ەمەس. زەرتتەۋشىلەر «سوندا بۇل نە؟ » دەگەن سۇراقتىڭ اينالاسىندا ءبىراز باس قاتىردى.

ەۋروپا عارىش اگەنتتىگى سايتىنىڭ مالىمدەۋىنشە، Mars Express زوندى اتالعان بۇلتتى ءۇش رەت بايقاعان. سونىمەن بىرگە، بۇلت ءبىر ۋاقىتتا، ءبىر مەزگىلدە قايتا- قايتا پايدا بولعان. «بۇل ەندى سايكەستىك ەمەس»، -  دەيدى ەعا عالىمدارى. مىنا سۋرەت Mars Express عارىش اپپاراتى كومەگىمەن تۇسىرىلگەن. بۇل سۋرەتتە بەلگىسىز بۇلت انىق كورىنىپ تۇر.

العاشىندا عالىمدار بۇلت مارس داۋىلىنان ارسيا تاۋىنىڭ اينالاسىندا پايدا بولاتىن شاڭنىڭ ناتيجەسى دەپ بولجاعان ەدى. ءبىراق زەرتتەۋشىلەر مارستاعى بۇل بۇلت ەمەس، سۋ بۋىنىڭ كورىنىسى دەگەن توقتامعا كەلىپ وتىر. ايتا كەتەيىك، بولونيا ۇلتتىق استروفيزيكا ينستيتۋتىنىڭ عالىمدارى مارستا شىنىندا سۋ بار ەكەنىن دالەلدەيتىن مالىمەتتەردى جاريالاعانىن، وسىعان دەيىن عالىمدار مارستا كەيدە مۇزدىڭ ەرۋىنەن سۋدىڭ بولۋى مۇمكىندىگىن، ءبىراق عالامشارداعى تومەن قىسىمعا بايلانىستى ونىڭ كوپ وتپەي بۋلانىپ جوق بولىپ كەتەتىنىندىگى تۋرالى جازعان ەدىك.

Massaget.kz