ينتەرنەت ساۋداسىمەن اينالىساتىن ساۋداگەرلەر ەرتەڭنەن باستاپ تابىس سالىعىن تولەمەسە بولادى
بۇگىندە الماتىدا 57 كاسىپكەر ينتەرنەت ساۋداسىمەن اينالىساتىن كاسىپكەر رەتىندە تىركەلگەن.
الماتىدا 27 زاڭدى تۇلعا، 30 جەكە كاسىپكەر ەلەكترونيكا، كيىم، اياق كيىم تاعى باسقا حالىق تۇتىناتىن تاۋارلاردى ينتەرنەت كەڭىستىگىندە ساتۋمەن اينالىسادى.
2018 -جىلدان باستاپ جاڭا سالىق كودەكسىنە سايكەس ەلەكتروندى ساۋدامەن اينالىساتىن كاسىپكەرلەرگە سالىقتىق جەڭىلدىكتەر قاراستىرىلعان. بۇل جەڭىلدىكتەر ينتەرنەت ساۋدادان تۇسكەن تابىس كاسىپكەردىڭ بارلىق تابىسىنىڭ % 90- ىن قۇراعان جاعدايدا عانا بەرىلەدى.
سونىمەن قاتار، تولەم تەك قانا كارتوچكامەن ءجۇرۋى كەرەك. ساتىپ الۋشىمەن مامىلە ەلەكتروندى تۇردە جاسالۋى، ساتۋشىنىڭ ءوزىنىڭ جەتكىزۋ قىزمەتى جۇمىس جاساۋى كەرەك.
جوعارىداعى تالاپتاردىڭ بارلىعى بار بولعان جاعدايدا كاسىپكەر سالىق ورگاندارىنا تىركەلۋگە مىندەتتى بولادى.
اۆتور: گۇلميرا عوسمانال