جەدەل جاردەم ستانساسى ءمادينا ءسادۋاقاسوۆاعا جاۋاپ قايتاردى

الماتى. قازاقپارات - الماتى قالالىق جەدەل جاردەم ستانساسىنىڭ اكىمشىلىگى ءانشى ءمادينا ءسادۋاقاسوۆانىڭ سىنىنا قاتىستى جاۋاپ قايتاردى، دەپ حابارلايدى قازاقپارات.

ينستاگرام الەۋمەتتىك جەلىسىندەگى جەكە اككاۋنتىندا ءمادينا ءسادۋاقاسوۆا جول تالعامايتىن كولىگىنە اۆتوبۋس كەلىپ سوعىلعانى تۋرالى جازعان. الايدا بۇل وقيعادا ءانشىنى اشۋلاندىرعان اپاتقا كىنالى ادام ەمەس. ول جەدەل جاردەمگە حابارلاسىپ، اۆتوبۋستا زارداپ شەككەن جولاۋشى ايەلگە كومەك بەرۋدى وتىنگەن. الايدا جەدەل جاردەم ديسپەتچەرلەرىنىڭ ارەكەتى ءانشىنىڭ شامىنا ءتيدى.

«103 نومىرىنە تەلەفون شالسام، تۇتقانى ۇزاق كوتەرمەدى، سوسىن جاۋاپ بەرگەن ديسپەتچەر ماعان وتە كوپ سۇراق قويدى. ول از بولعانداي، «مەديتسينالىق كومەك شىنىمەن كەرەك پە؟» دەپ وزىنەن سۇراۋ ءۇشىن زارداپ شەككەن ايەلدىڭ ءنومىرىن سۇرادى. مەن زارداپ شەككەن ايەل تۋرالى جانە اپات ورنىن حابارلادىم. مەنەن «الدىڭىزدا ءۇش ايۋدى كورىپ وتىرسىز با؟» دەپ سۇراعاندا، ءتىپتى اشۋلاندىم. وقيعا ورنىنا كەلىپ، جانسايانى الىپ كەتكەن جەدەل جاردەم قىزمەتكەرلەرىنە راحمەت. ونىڭ جانە اۆتوبۋستا زارداپ شەككەن تاعى ءبىر ايەلدىڭ جاعدايى جاقسى دەپ ۇمىتتەنەم»، - دەپ جازدى ءانشى.

الماتى قالالىق جەدەل جاردەم ستانساسىنىڭ اكىمشىلىگى جاعدايدى ءتۇسىندىرىپ ءوتتى.

«2018 -جىلدىڭ 23 -قازانىندا جەدەل مەديتسينالىق جاردەم پۋلتىنە ساعات 13:01-دە دوستىق داڭعىلى مەن جامبىل كوشەسىنىڭ قيىلىسىندا ورىن العان جول- كولىك اپاتى تۋرالى حابار كەلىپ ءتۇستى. بريگادا ساعات 13:04-تە جىبەرىلدى. بريگادا وقيعا ورنىنا ساعات 13:13-تە، ياعني 9 مينۋت ىشىندە جەتكەن» - دەپ باياندادى جەدەل جاردەم ستانساسىنىڭ باسپا ءسوز قىزمەتىنەن.

دارىگەرلەر سونداي-اق، زارداپ شەككەن ايەلدىڭ الماتى كوپسالالى كلينيكالىق اۋرۋحاناسىنا جەتكىزىلگەنىن ايتتى.

«وعان «يىقتىڭ سوعىلۋى، ەرىن مەن بەت جاراقاتى» الدىن الا دياگنوزى قويىلدى. جەدەل جاردەم بريگاداسىن كەزدەيسوق ءوتىپ بارا جاتقان ەر ادام شاقىرتقانىن، ونىڭ جول اپاتىنىڭ ورنىن كوپكە دەيىن تۇسىندىرە الماعانىن اتاپ ءوتۋ كەرەك. ولاي بولعانىمەن، جەدەل جاردەم قىزمەتكەرلەرى جىلدام جەتىپ، ءتيىستى مەديتسينالىق كومەكتى دەر كەزىندە كورسەتتى»، - دەپ مالىمدەدى ۇيىم.

«103» نومىرىنە حابارلاسقان ادامدارمەن سويلەسۋ بىردەن جازىلىپ، اقپاراتتىق- ديسپەتچەرلىك ءبولىم بازاسىندا ساقتالاتىنىن ەسكە سالعىمىز كەلەدى. اتالعان شاقىرۋ دا بازادا تىركەلگەن» - دەدى جەدەل جاردەم اكىمشىلىگىنەن.

ەسكە سالا كەتەيىك، 23 -قازان كۇنى قازاقستاندىق ءانشى ءمادينا ءسادۋاقاسوۆانىڭ جاياۋ جۇرگىنشىلەر جولاعىندا تۇرعان كولىگىنە اۆتوبۋس سوعىلعان بولاتىن.