لوندوندا «ورمەكشى ادامعا» ۇكىم شىعارىلدى

استانا. قازاقپارات - «ورمەكشى ادام» دەگەن لاقاپ اتپەن بەلگىلى فرانسيالىق الەن روبەر ۇلى بريتانيا استاناسىنداعى ءزاۋلىم عيماراتتىڭ بىرىنە شىققانى ءۇشىن 20 اپتاعا باس بوستاندىعىنان ايىرىلدى، دەپ حابارلايدى حابار 24 تەلەارناسى. مۇنداي شەشىمدى لوندون سوتى شىعاردى.

سوت ءتوراعاسىنىڭ ايتۋىنشا، روبەردىڭ ارەكەتى تاجىريبەسىز ادامداردى وسىنداي ارەكەتكە بارۋعا يتەرمەلەپ، ونىڭ سالدارى اۋىر بولۋى مۇمكىن.

سوندىقتان سوت وعان 5 جارىم مىڭ فۋنت ستەرلينگ ايىپپۇل سالىپ، ۇلى بريتانياداعى قانداي دا بولسىن عيماراتقا ورمەلەۋگە تىيىم سالدى.

ال «ورمەكشى ادام» بۇل جولى لوندونداعى 230 مەترلىك Salesforce Tower دەپ اتالاتىن بيىك عيماراتتىڭ ۇستىنە ادەتتەگىدەي ساقتاندىرۋشى ارقانسىز ورمەلەپ شىقتى.

ايتا كەتەيىك، الەن روبەر الەمدە 130-دان استام عيماراتتى باعىندىرعان. ولاردىڭ ىشىندە دۇنيەجۇزىندەگى ەڭ بيىك عيمارات - دۋبايداعى بۋردج-حاليفا مۇناراسى دا بار.