قازاقستانعا ساياحاتتايتىن ەۋروپالىقتاردىڭ ۇشتەن ءبىر بولىگى - پولشالىقتار

استانا. قازاقپارات - پولشا تۋريزم سالاسىنداعى تاجىريبەسىمەن بولىسۋگە دايىن.

ءدال وسى سالا ەۋروپالىق مەملەكەتكە ميلليونداعان ەۋرو پايداعا كەنەلتىپ وتىر، دەپ حابارلايدى قازاقپارات حابار 24 تەلەارناسىنا سىلتەمە جاساپ.

سوڭعى مالىمەتكە قاراعاندا، تۋريزمنىڭ ۇلەسى پولشانىڭ جالپى ىشكى ءونىمىنىڭ 6 پايىزىن قۇرايدى. بۇل سەكتوردا 700 مىڭعا جۋىق ادام ەڭبەك ەتەدى. قازاقستان ءۇشىن دە ءتۋريزمدى دامىتۋ - باستى باعىتتاردىڭ ءبىرى.

پولياك تۋروپەراتورلارى ەلىمىزدىڭ شيپاجايلى ورىندارىنىڭ الەۋەتى جوعارى ەكەنىن ايتىپ، ىنتىماقتاستىقتى دامىتۋعا نيەت ءبىلدىرىپ وتىر. ولاردىڭ دەرەگىنە سۇيەنسەك، قازاق جەرىنە ساياحاتتايتىن ەۋروپالىقتاردىڭ ۇشتەن ءبىر بولىگى - پولياكتار.

«تۋريزمدى دامىتۋ ءۇشىن بىزدە ارنايى باعدارلامالار دايىندالىپ، جۇزەگە اسىرىلدى. قازىر الەمنىڭ كوپتەگەن ەلدەرىندە پولشانىڭ تۋريستىك كەڭسەلەرى جۇمىس ىستەيدى. ءبىز تۇتىنۋشىلارعا الۋان ءتۇرلى تۋريستىك ونىمدەر ۇسىنىپ كەلەمىز. ال قازاقستانعا كەلەتىن بولساق، ۆارشاۆا- استانا تىكەلەي اۋە رەيسى اشىلعاننان بەرى ءسىزدىڭ ەلگە بارۋشى پولياك ساياحاتشىلارى 30 پايىزعا ارتتى»، - پولياك تۋريستىك پالاتاسىنىڭ پرەزيدەنتى پاۆەل نيۆيادومسكي.

وسى سانات بويىنشا «قورعاس» بەكەتى ارقىلى وتەتىن ەكسپورت پەن يمپورت كولەمى 386 مىڭ توننانى قۇرادى.