قازاقپارات پەن تاتاراقپارت ىنتىماقتاستىق مەموراندۋمىنا قول قويدى

قازان. قازاقپارات - قازاقستان رەسپۋبليكاسى مەن رەسەي فەدەراتسياسى اراسىنداعى ىنتىماقتاستىق تۋرالى ۇكىمەتارالىق كوميسسيانىڭ وتىرىسىندا «قازاقپارات» حالىقارالىق اقپارات اگەنتتىگى مەن «تاتار-ينفورم» اقپارات اگەنتتىگى ىنتىماقتاستىق تۋرالى مەموراندۋمعا قول قويدى، دەپ حابارلايدى «قازاقپارات» ح ا ا.

مەملەكەتتىك اقپارات اگەنتتىكتەرىنىڭ قۇجاتقا قول قويۋ ءراسىمى تاتارستان استاناسىنداعى قازان راتۋشاسىندا ءوتتى. مەموراندۋمعا «قازاقپارات» حاا باس ديرەكتورى اسقار ۋماروۆ پەن «تاتار- ينفورم» ا ا باس ديرەكتورى ءشامىل سادىقوۆ قول قويدى.

«بۇل مەموراندۋم تاتارستان مەن قازاقستاننىڭ بىرلەسكەن جوبالارى، تاتار جانە قازاق دياسپورالارىنىڭ ءومىرى تۋرالى جاڭالىقتاردى جىلدام تاراتۋعا مۇمكىندىك بەرەدى. ءبىزدىڭ مۇددەلەرىمىزدىڭ اياسى ساياسات، ەكونوميكا، رەسمي حرونيكامەن عانا شەكتەلمەيدى. ءبىز قوس حالىقتىڭ تىنىس- تىرشىلىگى، رەسپۋبليكا تۇرعىندارىن تولعاندىرىپ جۇرگەن ماسەلەلەر جايىندا اقپارات تاراتاتىن بولامىز»، - دەپ اتاپ ءوتتى ءشامىل سادىقوۆ.

«قازاقستان پرەزيدەنتى نۇرسۇلتان نازاربايەۆ حالىققا جولداۋىندا رەسەي مەن قازاقستاننىڭ قارىم- قاتىناسىن كوپكە ۇلگى دەدى. تاتارستاننىڭ رەسەيدىڭ ماڭىزدى ءوڭىرى ەكەنىن ەسكەرسەك، ءسىزدىڭ رەسپۋبليكاڭىزدان كەلەتىن اقپارات قازاقستاندىق اۋديتوريا ءۇشىن وتە ماڭىزدى»، - دەدى اسقار ۋماروۆ.

ونىڭ ايتۋىنشا، «تاتار- ينفورم» ا ا- مەن ارىپتەستىكتى دامىتا كەلە، «قازاقپارات» ح ا ا قوس مەملەكەت يگىلىگى ءۇشىن تاعى ءبىر ماقساتتى، ياعني اقپارات الماسۋدى ىسكە اسىرىپ وتىر.

«ءبىز ءۇشىن قازاننان سەنىمدى اقپارات الۋ، سونىمەن بىرگە استانادان سەنىمدى اقپارات ۇسىنۋ وتە ماڭىزدى»، - دەپ اتاپ ءوتتى اسقار ۋماروۆ.

قوس اقپارات اگەنتتىگى قول قويعان ىنتىماقتاستىق تۋرالى مەموراندۋم كاسىبي ىنتىماقتاستىقتى نىعايتۋ جانە اقپارات الماسۋعا باعىتتالعان. اتاپ ايتساق، تاراپتار تاجىريبە الماسۋ جانە كاسىبيلىكتى ارتتىرۋ ءۇشىن جۋرناليستەر جانە فوتوتىلشىلەرمەن الماسۋدى جوسپارلاپ وتىر. اقپارات اگەنتتىكتەرى ءوز مەملەكەتتەرىنىڭ اۋماعىندا اككرەديتتەلگەن جۋرناليستەر مەن فوتوتىلشىلەرگە ولاردىڭ كاسىبي قىزمەتىن جۇزەگە اسىرۋ كەزىندە ۇيىمداستىرۋشىلىق كومەك كورسەتەتىن بولادى.

ەسكە سالا كەتەيىك، وسى ۋاقىتقا دەيىن «قازاقپارات» حاا ەكى رەسەيلىك اقپارات اگەنتتىگى - تاسس جانە «باشينفورم» ا ا- مەن ىنتىماقتاستىق تۋرالى مەموراندۋمعا قول قويعان.

قىزمەت جىلدارىندا «قازاقپارات» ح ا ا الەمنىڭ 42 اقپارات اگەنتتىگىمەن ارىپتەستىك ورناتقان. ولاردىڭ اراسىندا «ازەرتادج» (ازەربايجان)، «انادولى» (تۇركيا)، «بەلتا» (بەلارۋس)، «ىRNA» (يران)، «كابار» (قىرعىزستان)، «Yonhap» (وڭتۇستىك كورەيا)، «ءوزا» (وزبەكستان)، «ارمەنپرەسس» (ارمەنيا)، «حوۆار» (تاجىكستان) جانە تاعى باسقالارى بار.

 

 فوتو: www.tatar-inform.ru