الماتى اۋەجايىندا وق-ءدارى الىپ وتپەك بولعان ايەل ۇستالدى

الماتى. قازاقپارات - الماتى اۋەجايىندا پاترون الىپ ۇشپاق بولعان ايەل ۇستالدى، دەپ حابارلايدى قازاقپارات الماتى قالالىق سوتىنىڭ سايتىنا سىلتەمە جاساپ.

الماتى قالاسىنىڭ تۇركسىب اۋداندىق سوتىندا تاۋىپ العان وق-ءدارىنى زاڭسىز ساقتاعانى ءۇشىن ا- عا قاتىستى قىلمىستىق ءىس قارالدى.

2018-جىلعى 31- مامىر كۇنى ساعات 13:00 شاماسىندا ا. الماتى قالاسىنىڭ «جۇلدىز-1» ىقشام اۋدانىنداعى «بالنۇر» سۇلۋلىق سالونىنىڭ جانىنان جەردەن ءبىر دانا وق تاۋىپ الىپ، سومكەسىنە سالعان. سول كۇنى، ساعات 13:50 شاماسىندا ا. استانا قالاسىنا ۇشۋ ءۇشىن اۋەجايعا كەلەدى. ساعات 14:15 دە اۋەۆوكزال عيماراتىنداعى تەكسەرۋ ايماعىنان ءوتۋ بارىسىندا رەنتگەن اپپاراتى ايەلدىڭ سومكەسىندە پاترون بار ەكەنىن كورسەتكەن.

ساراپشىنىڭ قورىتىندىسى بويىنشا، ول اسكەري پاترون ەكەنى ءارى اتۋعا جارامدى ەكەنى انىقتالدى.

ءسويتىپ، ا. وق-ءدارىنى زاڭسىز يەمدەنىپ، ساقتاپ جانە تاسىمالداعان.

سوت وتىرىسىندا سوتتالۋشى ا. ءوز كىناسىن مويىنداپ، وكىنەتىنىن ايتتى.

سوت ۇكىمىمەن ا. قازاقستان رەسپۋبليكسىنىڭ قىلمىستىق كودەكسىنىڭ 287-بابىنىڭ 3-بولىگىنە سايكەس ايىپتى دەپ تانىلىپ، 1 جىل مەرزىمگە باس بوستاندىعىن شەكتەۋ جازاسى بەلگىلەندى.

ۇكىم زاڭدى كۇشىنە ەندى.