حالىقارالىق ۆاليۋتا قورىنىڭ بۇرىنعى باس ديرەكتورى تۇرمەگە قامالدى
رودريگو راتو 2004-2007 -جىلدارى حالىقارالىق ۆاليۋتا قورىن باسقارعان، ال وعان دەيىن يسپانيانىڭ ەكونوميكا ءمينيسترى دانە ۇكىمەت ءتوراعاسىنىڭ ورىنباسارى بولعان. ول 25 - قازاندا سوتو- ەل- رەال تۇرمەسىنە قامالدى، دەپ حابارلايدى DW يسپانيا ءى ءى م جانىنداعى پەنيتەنتسيارلىق مەكەمەلەر باس حاتشىلىعىنا سىلتەمە جاساپ. ۇكىم 2017 -جىلدىڭ اقپانىندا شىعىپ، جوعارى سوتتا قايتا قارالدى. الايدا، بۇل شەشىم وزگەرمەدى.
روتانىڭ ۇكىمى ونىڭ يسپانيا ۇكىمەتىندەگى، حالىقارالىق ۆاليۋتا قورىنداعى قىزمەتىنە قاتىسى جوق. ول يسپانيانىڭ Bankia ءىرى بانكتەرىنىڭ ءبىرىنىڭ رەزەرۆىن ماقساتقا ساي پايدالانباعان. ول بۇل بانكتى 2010-2012 -جىلدارى باسقارعان. ول وكىلدەر شىعىسىن تولەۋگە ارنالعان كورپوراتيۆتىك نەسيە كارتاسىن جەكە قاجەتتىلىگىنە جۇمساعان. ونىڭ شىعىنى 100 مىڭ ەۋرونى قۇرايدى. ول بۇل قارجىعا كيىم- كەشەك، الكوگولدىك ىشىمدىك، ءيىس سۋ الىپ، مەيرامحاناداعى جەكە شوتتارىن تولەگەن. نەسيەلىك كارتانى باقىلاۋسىز قولدانعان بانكتىڭ 14 باسشىسى دا وسىنداي مەرزىمگە اباقتىعا جابىلدى.
Bankia پرەزيدەنتىنىڭ قىلمىسى اۋديتورلىق تەكسەرىس كەزىندە انىقتالدى. بۇل بانك 2010 -جىلدارى الەمدىك قارجى داعدارىسى سالدارىنان 3 ميلليارد ەۋرو جوعالتقان ەدى. 2012 -جىلى بانك كۇيرەۋگە ۇشىراپ، ەۋرووداق نەسيەلەرىنىڭ كومەگىنە جۇگىنگەن. راتو داعدارىستىڭ الدىن الا الماي، بىرنەشە قاتە شەشىم قابىلداپ، بانكتىڭ جاعدايىن ناشارلاتىپ جىبەرگەن.
اقشا جىمقىرۋ، بانك اكتيۆتەرىنىڭ ءىزىن جاسىرۋ، سالىق تولەمەۋگە بايلانىستى 2017 -جىلدىڭ جازىندا قوزعالعان وندىرىستىك ءىس ءالى دە جالعاسىپ جاتىر. وسى ىسپەن اينالىسىپ جاتقان مادريد قالالىق №31 سوتى ءمالىم ەتكەندەي، راتو وففشورلاردا، اتاپ ايتقاندا پانامادا 8 ميلليون ەۋرو جىمقىرعان. راتونىڭ ءوزى بۇل قىلمىستاردى جوققا شىعارۋدا. ونىڭ ايتۋىنشا، وففشورلاردا ونىڭ وتباسىنىڭ كاپيتالى، سونىڭ ىشىندە اكەسىنىڭ - ءىرى كاسىپكەردىڭ مۇراسى ساقتاۋلى تۇر. يسپانيا سالىق ۆەدومستۆوسىنىڭ دەرەگى بويىنشا، راتونىڭ داۋلەتى 27 ميلليون ەۋرو دەپ باعالانىپ وتىر.
El Confidencial بەدەلدى ينتەرنەت- باسىلىمىنىڭ مالىمەتى بويىنشا، راتو قازىر جوعارعى سوتتىڭ شىعارعان ۇكىمىنە شاعىم تۇسىرمەكشى.
فوتو: ينوسمي