كۇرەس: قازاقستاندىق قىزدار الەم چەمپيوناتىن جۇلدەسىز اياقتادى

استانا. قازاقپارات - بۋداپەشتە ءوتىپ جاتقان كۇرەستەن الەم چەمپيوناتىندا قازاقستاندىق قىزدار جارىستى جۇلدەسىز اياقتادى، دەپ حابارلايدى قازاقپارات ءتىلشىسى.

ق ر كۇرەس تۇرلەرى فەدەراتسياسى باسپا ءسوز قىزمەتىنىڭ حابارلاۋىنشا، بۋداپەشتە ءوتىپ جاتقان الەم چەمپيوناتىندا قىزدار كۇرەسىنەن جارىس اياقتالدى. 53 كەلى سالماقتا ەل نامىسىن قورعاعان جۇلدىز ەشىموۆا الەم چەمپيوناتىن بەسىنشى ورىنمەن قورىتىندىلادى. وكىنىشكە قاراي، جۇلدىز قولا مەدال ءۇشىن بولعان بەلدەسۋدە كانادالىق ديانا ۆايكەردەن 2:3 ەسەبىمەن جەڭىلىپ قالدى.

ايتا كەتەيىك، جۇلدىز كەشە جارىستىڭ 1/8 فينالىندا امەريكاندىق سارا حيلدەبراندتان ۇتىلىپ قالعان ەدى. ال جۇبانىش بەلدەسۋدە ازىربايجاندىق انجەلا دوروگاننان 5:3 ەسەبىمەن باسىم ءتۇستى.

بۇعان دەيىن حابارلاعانىمىزداي، قازاقستان قۇراماسىنىڭ بالۋاندارى ەركىن كۇرەستەن ءبىر كۇمىس مەدال جەڭىپ العان بولاتىن. ونى قورجىنىمىزعا 57 كەلى سالماقتا كۇرەسكەن نۇريسلام سانايەۆ سالدى.

اۆتور: كۇنسۇلتان وتارباي