قازاقستاندىق جاس عالىمعا الەمدىك الپاۋىت كومپانيالار قىزىعىپ وتىر
دارىندى جىگىت نيۋ- يوركتە ناسا ۇيىمداستىرعان سايىستا جەڭىسكە جەتىپ، عىلىمي قاۋىمدى تاڭ قالدىردى.
تيمۋر ءۇش جاسىندا كوبەيتۋ كەستەسىن جاتتاپ العان. مەكتەپ قابىرعاسىندا جۇرگەندە، ماتەماتيكا جانە فيزيكا وليمپيادالارىندا تالاي رەت توپ جاردى. ال ونەرتاپقىش رەتىندە العاشقى جۇلدەسىن تانك تۇرىندەگى روبوتى ءۇشىن الدى. ول قورشاعان ورتانى ساقتاۋعا ارنالعان. قازىر ەكى بىردەي وقۋ ورنىندا ءبىلىم الىپ ءجۇر. حالىقارالىق ۇزدىكسىز ءبىلىم الۋ كوللەدجىمەن قاتار ماسساچۋسەتس تەحنولوگيالىق ينستيتۋتىندا قاشىقتىقتان وقيدى.
NASA ۇيىمداستىرعان دۇنيەجۇزىلىك سايىستا تيمۋر باستاعان توپ ءبىرىنشى ورىنعا يە بولدى. ولار وپپورتيۋنيتي جانە كيۋريوسيتي مارسوحودتارى كەزىككەن ماسەلەلەردى شەشكەنى جانە كەزدەيسوق ساندار گەنەراتورى ءۇشىن باس جۇلدەمەن ماراپاتتالدى.
تيمۋر رىسپەكوۆ، NASA سايىسىنىڭ جەڭىمپازى:
- بيىل وپپورتيۋنيتيمەن نە بولعانىن كوبىسى ەستىگەن. باتارەياسىنداعى اقاۋدىڭ سالدارىنان بايلانىسقا شىقپاي قويعان. وسى ماسەلەنىڭ شەشىمىن باسقارىلمالى رەلەمەن تاجىريبە وتكىزىپ كورسەتتىك. ول قۋات بولماعاندا، اجىراتىلادى، ال كۇن باتارەياسىنان قۋات تۇسكەندە، ىسكە قوسىلادى. وسى شەشىمدى تەلەفوندى قۋاتتاندىرۋ كەزىندە دە قولدانۋعا بولادى. تەلەفون جارىلعان وقيعالار بولعانىن بىلەمىز.
نيۋ- يورككە تيمۋرمەن بىرگە جوبا ديزاينىمەن اينالىسۋشى اناستاسيا كلەشيەۆا جانە قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ ستۋدەنتى ۆلاديسلاۆ پولونسكيي كەلگەن.
ۆلاديسلاۆ پولونسكيي، ق. ساتپايەۆ اتىنداعى قازاق ۇ ت ز ۋ ستۋدەنتى:
- مەنىڭ مىندەتىم جوبا تۇساۋكەسەرىن جانە قازىلار القاسى ءۇشىن ءماتىن دايىنداۋ بولعان. سونداي- اق مارسوحود روبوتىمىزدى شىعارۋعا قاتىستىم. ءبىز وزگە دە سايىستارعا قاتىسۋدى كوزدەپ وتىرمىز.
بۇگىندە تيمۋر فيزيكا، ماتەماتيكا جانە ينفورماتيكا سالالارىندا 30 پاتەنت پەن اۆتورلىق قۇقىققا يە. ازيا جانە شىعىس ەۋروپانىڭ ۇزدىك يننوۆاتسيالىق جوباسى ءۇشىن Microsoft ۇيىمداستىرعان سايىستا جەڭىسكە جەتكەننەن كەيىن تيمۋردى بۇل كومپانيا مەن ا ق ش- تىڭ وزگە دە ءىرى كورپوراتسيالارى جۇمىسقا شاقىرا باستادى.
تيمۋر رىسپەكوۆ، NASA سايىسىنىڭ جەڭىمپازى:
- ءبىزدىڭ نەگىزگى باسىمدىعىمىز، كەزدەيسوق سانداردىڭ كۆانت گەنەراتورى. فوتوندار سيپاتتامالارىنىڭ ءار تۇرلىلىگى ارقاسىندا كەزدەيسوق مالىمەتتەردى تۇرلەندىرە الادى. مۇنى بانك جۇيەسىندە جەكە دەرەكتەردى ساقتاۋ ءۇشىن، قارجىلىق تاۋەكەلدەردى بولجاۋعا، مەديتسينا سالاسىندا ءتۇرلى دارىلەر شىعارۋعا جانە كەن- تاۋ ونەركاسىبىندە قولدانۋعا بولادى.
وسىنداي بىرەگەي ونەرتابىستارى ءۇشىن الەمدىك كومپانيالار تيمۋرعا ۇلكەن سىياقى ۇسىنىپ وتىر. الايدا ول ءوز ەلىمىزدە جۇمىس ىستەۋدى تاڭداپ، «100 جاڭا ەسىم» جوباسىندا جەڭىسكە جەتكەن.
تيمۋر رىسپەكوۆ، NASA سايىسىنىڭ جەڭىمپازى:
- ءبىر ۇيىم مەن ءبىر جەكە تۇلعاعا العىسىمدى بىلدىرگىم كەلەدى. بۇل ساپارىمىزدى ۇيىمداستىرىپ، ۆيزالاردى راسىمدەۋگە كومەكتەسكەن جانە جولاقىمىزدى تولەگەن قازاقستان رەسپۋبليكاسى تۇڭعىش پرەزيدەنتى - ەلباسى قورى. سونداي- اق سايىستارعا قاتىسۋعا جانە ستارتابىمىزدا جۇمىسىمىزدى ۇيىمداستىرعان ۇستازىمىز احتانوۆ ەرجانعا العىسىمدى ايتامىن.
www.24.kz