قازاقستان شەت مەملەكەتتەرگە قانشا كولەمدە ەت ەكسپورتتايدى
بۇل تۋرالى بۇگىن ەلوردادا ءوتىپ جاتقان Astana Agroforum-2018 رەسپۋبليكالىق كەڭەسىندە ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ايتتى، دەپ حابارلايدى قازاقپارات ءتىلشىسى.
«ەت باعدارلاماسىنا سايكەس ماقساتىمىز - زاكىرلىك كووپەراتسيالار جۇيەسىن جانە شامامەن 100 مىڭ شاعىن وتباسىلىق فەرما قۇرۋ. كووپەراتسيا قۇرامىندا مال بورداقىلاۋ الاڭدارى مەن ەت كومبيناتتارى جۇمىس ىستەيتىن بولادى. ال ءسۇت سالاسىنداعى ماقساتىمىز - الداعى بەس جىلدا 1 ميلليون توننا ءسۇت ءوندىرۋ. مۇندا دا نەگىزگى تەتىك ءىرى ءسۇت- تاۋارلىق كومپانيالارمەن جۇمىس ىستەيتىن وتباسىلىق ءسۇت فەرمالارى بولماق»، - دەدى ول.
ونىڭ ايتۋىنشا، قازىرگى ۋاقىتتا بۇل باعدارلامالار ءوز جەمىسى بەرىپ جاتىر. ماسەلەن، 2017 -جىلى ەلىمىز 5,5 مىڭ توننا ءىرى قارا مال ەتىن ەكسپورتقا شىعارسا، وسى جىلدىڭ 9 ايىندا عانا ەكسپورتقا جونەلتىلگەن ەت كولەمى 11 مىڭ توننادان اسىپ جىعىلدى.
«ءبىز جىل سوڭىنا دەيىن 15 مىڭ توننا سيىر ەتىن ەكسپورتقا شىعارامىز دەپ تولىق سەنىممەن ايتا الامىز»، - دەدى ءو. شوكەيەۆ.
سونىمەن قاتار ول ەلىمىز الداعى بەس جىلدا قۇس ەتىن ءوندىرۋدى 5 ەسە ۇلعايتى ماقساتىن العا قويىپ وتىرعانىن ايتتى.
«وعان مۇمكىنشىلىك تە بار. ماسەلەن، تاياۋدا ماكينسكىدە ءبىزدىڭ ولشەممەن وتە ۇلكەن سانالاتىن، جىلىنا 50 مىڭ توننا قۇس ءوتىن وندىرەتىن فابريكانى اشتىق»، - دەدى ۇكىمەت باسشىسىنىڭ ورىنباسارى.
ايتا كەتەيىك، ق ر پرەزيدەنتى نۇرسۇلتان نازاربايەۆ ەلوردادا ءوتىپ جاتقان Astana Agroforum-2018 رەسپۋبليكالىق كەڭەس قاتىسۋشىلارىنا قۇتتىقتاۋ جولدادى.
