سەنات قازاقستان مەن كورشى ەلدەر شەكارالارىنىڭ ءتۇيىسۋ نۇكتەسىنە قاتىستى قۇجاتتى قابىلدادى
شارتتىڭ باستى ماقساتى - ءۇش مەملەكەت شەكارالارىنىڭ ءتۇيىسۋ نۇكتەسىنىڭ ورنالاسقان جەرىن ايقىنداۋ.
«ءۇش مەملەكەت شەكاراسىنىڭ ءتۇيىسۋ نۇكتەسى ءۇستىرت اۋماعىندا ورنالاسقان. ءتۇيىسۋ نۇكتەسىنىڭ ورنالاسقان جەرى جانە شەكارا سىزىعىنىڭ ءوتۋى - شارتتىڭ اجىراماس بولىگى. شارت مەرزىمسىز ءارى دەنونساتسيالاۋعا جاتپايدى. قۇجاتتىڭ كۇشىنە ەنۋى ءۇش مەملەكەت شەكارالارىن دەليميتاتسيالاۋ پروتسەسىنىڭ اياقتالۋىنا، اۋماقتىق داۋلاردىڭ تۋىنداۋىنىڭ الدىن الۋعا، ەلىمىزدىڭ ۇلتتىق قاۋىپسىزدىگىن نىعايتۋعا ىقپال ەتەدى»، - دەيدى ق ر سىرتقى ىستەر ءمينيسترى قايرات ءابدىراحمانوۆ.
وسى ورايدا ۆەدومستۆو باسشىسى بۇل شارت قازاقستاننىڭ مەملەكەتتىك شەكاراسىن دەليميتاتسيالاۋدى تولىعىمەن اياقتايتىن سوڭعى قۇجات ەكەنىن قاداپ ايتتى.
بۇدان بۇرىن حابارلانعانداي، بۇگىن پارلامەنت سەناتىنىڭ جالپى وتىرىسىندا «قازاقستان رەسپۋبليكاسى مەن قىرعىز رەسپۋبليكاسى اراسىنداعى قازاقستان-قىرعىز مەملەكەتتىك شەكاراسىن شەگەندەۋ تۋرالى شارتتى راتيفيكاتسيالاۋ» تۋرالى زاڭى قابىلداندى.