سەمەي زيالىلارى قۇنانباي قاجىنىڭ اتىنا كوشە بەرۋدى سۇراپ وتىر

استانا. قازاقپارات - سەمەي قالاسىنىڭ ءبىر توپ زيالى قاۋىم وكىلدەرى ۇلى ابايدىڭ اكەسى قۇنانباي وسكەنباي ۇلىنىڭ اتىنا كوشە بەرۋ تۋرالى باستاما كوتەردى، دەپ حابارلايدى قازاقپارات ءتىلشىسى ابايدىڭ «جيدەباي-ءبورىلى» قورىق-مۋزەيىنىڭ باسپا ءسوز قىزمەتىنە سىلتەمە جاساپ.

باستاما اتالمىش قورىق-مۋزەيدىڭ فەيسبۋكتەگى پاراقشاسىندا جاريالاندى.

«قازاقتىڭ الىبى دا، اسقارى دا - اباي، ۇلى اقىننىڭ اسىل مۇراسى دا ادامزاتقا ورتاق. 2020-جىلى اباي (يبراھيم) قۇنانباي ۇلىنىڭ تۋعانىنا 175 جىل، ۇلى اقىن مۋزەيىنىڭ قۇرىلعانىنا 80 جىل تولادى. بۇل مەرەيتوي - رەسپۋبليكا جۇرتشىلىعى ءۇشىن ايتۋلى وقيعا. اباي، شاكارىم، مۇحتار، سونداي-اق كۇللى الاش ارىستارىنىڭ مول مۇراسىن ەرتەڭگە جەتكىزۋ - تەك اباي قاراشاڭىراعى قىزمەتكەرلەرىنىڭ عانا ەمەس، بارشا ەل يگىلىگىن ويلاعان ازاماتتاردىڭ پارىزى»، - دەلىنگەن حابارلامادا.

«جيدەباي-ءبورىلى» مەملەكەتتىك قورىق-مۋزەيىنىڭ باستاماسىمەن ۇستىمىزدەگى جىلدىڭ 16- قازانىندا سەمەي قالاسىنىڭ اكىمى ە. سالىموۆكە رەسپۋبليكاعا ەڭبەگى سىڭگەن ءبىر توپ قايراتكەرلەر مەن ابايتانۋشىلار اتىنان قۇنانباي وسكەنباي ۇلىنا كوشە بەرۋ تۋرالى حات جولدانعان.

«ابايدىڭ تۋىستىق اينالاسىندا اكەسى قۇنانباي وسكەنباي ۇلىنىڭ ورنى ەرەكشە. زامانىندا تۋعان ۇلتىنىڭ سالت-ءداستۇرىن بەرىك ۇستانىپ، ەل-جۇرتىنا مىعىم بيلىك قۇرعان اعا سۇلتان قۇنانباي - ءوز زامانىنىڭ ءبىرتۋار قايراتكەرى. ادولف يانۋشكيەۆيچتىڭ «كۇندەلىكتەر مەن حاتتار» كىتابىنداعى قۇنانبايعا بەرىلگەن مىنەزدەمە ونىڭ 40 جاسقا دەيىنگى مىنەز-قۇلقىن، ءىس-ارەكەتىن، ابىروي-بەدەلىن تانىتادى:

«قۇنانباي ءبيدىڭ جاسى باراق سۇلتاننان ءبىراز ۇلكەن. بۇل دا دالا وڭىرىندە اتى كەڭ جايىلعان ادام. قاراپايىم قازاقتىڭ بالاسى. تابيعات وعان كەسەك اقىل، عاجايىپ ەس جانە جۇيرىك ءتىل بەرگەن. ىسكەر، ءوز اتالاستارىنىڭ يگىلىگى ءۇشىن قام جەيدى. قازاقتارعا قاتىستى روسسيالىق ۋستاۆتاردى بەس ساۋساعىنداي بىلەدى. قارا قىلدى قاق جارعان ءبي جانە ونەگەلى مۇسىلمان». قۇنانبايدىڭ ءوز زامانىندا قانداي كەسەك تۇلعا بولعانىن قازاقستاننىڭ، رەسەيدىڭ ومبى، سانكت-پەتەربۋرگ، موسكۆا قالالارىنىڭ ارحيۆتەرىندەگى توبىقتى ەلىنىڭ جاي-كۇيى باياندالاتىن جازبالار دا ءمالىم ەتەدى»، - دەلىنگەن حابارلامادا.

وسى ايتىلعان جايلاردى ەسكەرە وتىرىپ، زيالى قاۋىم وكىلدەرى قالا اكىمىنەن سەمەيدىڭ كورىكتى ءبىر كوشەسىنە قازاق حالقىنىڭ قۇنانبايداي اياۋلى پەرزەنتىنىڭ ەسىمىن بەرۋدى سۇرايدى.

«سەمەي قالاسى زيالى قاۋىمى اتىنان ن. سەمبايەۆ، ح. ماتايەۆ، ا. ەسپەنبەتوۆ، ن. ءاپسالاموۆ، ب. ەرسالىموۆ، م. جانبولاتوۆ، ا. احمەتجانوۆ، س. كوشكين، ز. توقايەۆ، ت. ابدىكاكىموۆ، ب. جۇنىسبەكوۆ، م. مۇحامەدي ۇلى، ا. وماروۆ جانە ت. ب. قول قويدى. سەمەي قالالىق اكىمدىگى وسكەلەڭ ۇرپاقتى ۇلتجاندىلىق رۋحتا تاربيەلەۋدەگى ءمانى زور يگىلىكتى ءىستى ءبىراۋىزدان قولداي وتىرىپ، اباي قۇنانباي ۇلىنىڭ الداعى 2020-جىلى تويلاناتىن 175 جىلدىعىنا وراي قالا تۇرعىندارىنا ەرەكشە تارتۋ جاسايتىنىنا سەنىمدىمىز»، - دەلىنگەن حابارلامادا.