قازاق كۇرەسىنەن كونفەدەراتسيا كۋبوگىنىڭ جارتىلاي فيناليستەرى انىقتالدى
سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ باسپا ءسوز قىزمەتى ءمالىم ەتكەندەي، جارىسقا 10 كوماندادان 121 قازاق كۇرەسىنىڭ شەبەرى قاتىستى.
كوماندالىق جارىستا سپورتشىلار بوز كىلەمدە 8 سالماق دارەجەسى، ياعني 55 كەلى، 60 كەلى، 66 كەلى، 74 كەلى، 82 كەلى، 90 كەلى، 100 كەلى، 100+ كەلى سالماقتاردا بەلدەستى.
ناتيجەسىندە، ءتورت توپتان ۇزدىكتەر ىركتەلىپ، ءار توپتىڭ جەڭىمپازدارى انىقتالدى. وسىلايشا بيىلعى قازاق كۇرەسىنەن كونفەدەراتسيا كۋبوگىنىڭ جارتىلاي فينالدىق كەزەڭىنە ءتورت كوماندا جولداما جەڭىپ الدى.
ولار:
«ا» توبى - «ەلوردا باتىرى» س ك (استانا ق)
«B» توبى - «Qazaq kuresi» س ك (الماتى ق)
«س» توبى - «قاراعاندى وبلىسى قازاق كۇرەسى» (قاراعاندى وبلىسى)
«D» توبى - «زاك كار» قازاق كۇرەسى س ك (قاراعاندى وبلىسى)
ەستەرىڭىزگە سالا كەتسەك، العاشقى جىلى بەس سپورت تۇرىنەن وتكەن بەدەلدى باسەكەنىڭ باعدارلاماسىنا 2017-جىلى ۇلتتىق كۇرەس ەنگىزىلگەن بولاتىن. ىرىكتەۋگە سەگىز ايماقتان ون كلۋب قاتىسىپ، الماتىنىڭ «Qazaq kuresi» سپورت كلۋبى جەڭىمپاز اتانعان ەدى.
كونفەدەراتسيا كۋبوگى - بارلىق 14 وبلىس پەن رەسپۋبليكالىق ماڭىزى بار 3 قالانىڭ كوماندالارى اراسىندا بوكس، گرەك-ريم، ەركىن كۇرەس، قازاق كۇرەسى، دزيۋدو جانە تاەكۆوندودان وتەتىن رەسپۋبليكالىق ماڭىزى بار تۋرنير. بۇل سايىستىڭ ەرەكشەلىگى سول، سپورتتىڭ بارلىق تۇرلەرىنەن بولاتىن فينالدىق ويىنداردى كورەرمەندەر ءبىر مەزەتتە تاماشالاي الادى. تۋرنير بيىل ءۇشىنشى مارتە جالاۋىن كوتەرىپ وتىر. كونفەدەراتسيا كۋبوگى 2016-جىلدان باستاپ وتكىزىلىپ كەلەدى.
اۆتور: كۇنسۇلتان وتارباي