تانىمال ءانشى الاياقتىق جاسادى دەپ ايىپتالۋدا

استانا. قازاقپارات - ەلگە تانىمال ءانشى قارجىلىق ۇيىم قۇرىپ، الاياقتىق جاساعانى ءۇشىن ايىپتالۋدا، دەپ حابارلايدى ەلوردا ينفو.

بۇگىنگى كۇنى استانا قالاسى پوليتسيا دەپارتامەنتىنىڭ تەرگەۋ باسقارماسىندا قازاقستان رەسپۋبليكاسى ق ك- ءنىڭ 190- بابى 3-بولىگى 1-تارماعىمەن (الاياقتىق) قىلمىستىق ءىستى تەرگەپ-تەكسەرۋ جۇرگىزىلىپ جاتىر. اتالعان قىلمىستىق ءىستى تەرگەپ-تەكسەرۋ بارىسىندا 2018-جىلدىڭ شىلدە ايىنىڭ باس كەزەڭىندە «ۋ» دەگەن ازاماتشا («اقجايناق» دەپ ەلگە تانىلعان حالىق ءانىن ورىنداۋشى، ەلگە تانىمال ءانشى) ءوزىنىڭ ءال اۋحاتى تومەن وتباسىلارعا، مۇگەدەكتەرگە، جالعىز باستى انالارعا جانە ت. ب. ماتەريالدىق تۇرعىدان جاعدايى تومەن ادامدارعا كومەك بەرگىسى كەلەتىندەگىن ايتىپ، «اقجايناق» دەپ اتالاتىن قارجىلىق ۇيىم قۇرعان.

«بۇل قارجىلىق ۇيىمدا ءار قاتىسۋشى شاماسىنا قاراي 20000 تەڭگەدەن باستالاتىن قاراجات سالۋ ارقىلى 5-10 كۇننىڭ ىشىندە ءوز ارتىنان 2 ادام الىپ كەلگەن جاعدايدا سالعان 20000 تەڭگەسى ەكى ەسەلەنىپ، 40000 تەڭگەگە ءوسىپ وتىرعان. ەگەر تاعى دا الىپ كەلگەن ەكى ادامنان بولەك ەكى ادام تارتىپ وتىرسا، سول باستاپقى سالعان 20000 تەڭگەسىن ەش قيىندىقسىز الىپ وتىرعان. وسىلايشا اتالعان ۇيىم 2018-جىلدىڭ تامىز ايىنىڭ باس كەزەڭىنە دەيىن جالعاسىپ، ناتيجەسىندە بىرنەشە ادامعا ماتەريالدىق شىعىن كەلتىرىلگەن» دەلىنگەن حابارلامادا.

الدىن الا تەرگەۋ بارىسىندا انىقتالعانداي، 2018-جىلدىڭ 17-18- شىلدەسىنە دەيىن اقشا سالعان ادامدار ءوز اقشالارىن وسىممەن ەكى ەسەلەپ الىپ، كەيىنگى سالعان ادامدار اقشاسىز قالىپ وتىر.

الاياقتىق دەرەگىنىڭ جانە الاياقتاردىڭ قۇربانى بولماۋ ماقساتىندا قازاقستان رەسپۋبليكاسى ازاماتتارىنىڭ قاپەرىنە تەلەفون ارقىلى بەلگىسىز تۇلعالاردىڭ ءارتۇرلى ۇسىنىمدارىنا سەنبەۋگە، ادامداردىڭ جانە ۇيىمنىڭ زاڭدى قۇجاتتارىنا كوز جەتكىزبەي، مەملەكەتتىك ۇيىمداردان زاڭدىلىعىن تەكسەرمەي جاتىپ، ەشقانداي اقشا جانە قۇندى زاتتار ۇسىنباۋدى سۇرايدى.