ولجاس سۇلەيمەنوۆتىڭ كوز جۇمعان نەمەرەسى ەسكەندىر دە ولەڭ جازعان

استانا. قازاقپارات - استانادا جول اپاتىنان مەرت بولعان اقىن ولجاس سۇلەيمەنوۆتىڭ نەمەرەسى - ەسكەندىر سۇلەيمەنوۆتىڭ ولىمىنە قاتىستى بۇگىنگى سوت پروتسەسى اياقتالدى.

سوت وتىرىسىندا مارقۇمنىڭ دوسى قۋانىش تۇراتايەۆ دوسى ەسكەندىردىڭ قانداي ادام بولعانىن ايتىپ بەردى، دەپ حابارلايدى قازاقپارات ءتىلشىسى.

«مەن ەسكەندىردىڭ دوسى ءارى ارىپتەسىمىن. ءبىز ۇلتتىق كومپانيادا ءبىر جىلداي بىرگە جۇمىس ىستەدىك. مەنىڭ ايەلىم مەن ەسكەندىر فرانسيادا بىرگە وقىعان. مەنىڭ زايىبىم ونى ءوزىنىڭ باۋىرى دەپ ەسەپتەيتىن. ول ءبىزدىڭ وتباسى ءۇشىن وتە جاقىن ادام ەدى. ءبىر-ءبىرىمىزدى بۇرىن سىرتتاي بىلگەنىمىزبەن، كەيىن الماتىدا تانىستىق. ەسكەندىر سەنىمدى دوس ءارى ارىپتەس ەدى. قيىن ساتتەردە سەنۋگە بولاتىن ناعىز ازامات بولاتىن. جاقىندارى مەن تۋىستارىنىڭ قۋانىشىنا شىن جۇرەگىمەن قۋانا بىلەتىن. ول شىنايى ادام ەدى. كوكجيەگى كەڭ بولاتىن. ونەردى جاقسى ءتۇيسىندى، پوەزيانى ءسۇيدى. ولەڭ جازىپ ءجۇردى. يتاليان جانە اعىلشىن ءتىلىن جەتىك ءبىلدى»، - دەيدى ەسكەندىردىڭ دوسى.

ونىڭ ايتۋىنشا، ەسكەندىردىڭ ءاربىر جاعدايعا قاتىستى وزىندىك پىكىرى بولاتىن.

«ول وتە اشىق ادام ەدى. سۇيىكتىسىن، تۋىستارىن، دوستارىن جاقسى كوردى. ءبىز ۇنەمى بىرگە تۇستەنەتىنبىز. سونداي تۇسكى استاردىڭ بىرىندە ۇيلەنۋ تۋرالى ۇسىنىستى قالاي جاساۋعا بولاتىنى جونىندە اقىلداسقانىمىز بار. ونىڭ ارىپتەسى رەتىندە ايتارىم - ول ءبىزدىڭ كومپانيانىڭ جاۋاپتى دەپارتامەنتتەرىنىڭ بىرىندە ەڭبەك ەتتى. جاۋاپكەرشىلىگى مول مامان، سالماقتى ساراپشى بولدى. ۇجىم ونى بايسالدى ءارى جاۋاپتى مامان رەتىندە بىلەدى. ونىمەن كەز كەلگەن ۋاقىتتا اقىلداسىپ، ماڭىزدى سۇراقتاردىڭ جاۋابىن تابۋعا بولاتىن ەدى. ەسكەندىردىڭ ديپلوماتيالىق قاسيەتىن بىلگەن باسشىلىق ونى ىسكەرلىك كەلىسسوزدەرگە جۇمىلدىرىپ تا ءجۇردى. قىسقاسى، ونى ۇجىمدا ءبارى باعالايتىن، جاقسى كورەتىن»، - دەدى قۋانىش تۇراتايەۆ.

دوسىنىڭ ايتۋىنشا، ەسكەندىر شەتەلدەن وقىپ كەلگەننەن كەيىن ءوز وتانىنىڭ دامۋىنا ۇلەس قوسۋدى ماقسات تۇتقان.

ەسكە سالا كەتسەك، وسى جىلدىڭ ماۋسىمىندا استاناداعى جول اپاتىندا ولجاس سۇلەيمەنوۆتىڭ 26 جاستاعى نەمەرەسى ەسكەندىر سۇلەيمەنوۆ مەرت بولعان ەدى. ەسكەندىر تىزگىندەگەن موتوسيكل قيىلىسقا شىققان كولىككە سوعىلدى.

ارادا كوپ وتپەي استانا قالالىق ىشكى ىستەر دەپارتامەنتى اپاتقا سەبەپكەر بولۋى مۇمكىن Hyundai اۆتوكولىگىنىڭ يەسى، 29 جاستاعى استانالىق كەلىنشەككە قاتىستى تەرگەۋ امالدارى ءجۇرىپ جاتقانىن حابارلاعان ەدى.

سونداي-اق، قالالىق پوليتسيا دەپارتامەنتى ەسكەندىر سۇلەيمەنوۆتىڭ موتوسيكلى سوعىلعان جۇرگىزۋشى قىزىلوردا وبلىستىق ىشكى ىستەر دەپارتامەنتى باستىعىنىڭ قىزى ەكەنىن راستاعان.

ايتا كەتسەك، 12 -قازاندا ولجاس سۇلەيمەنوۆتىڭ نەمەرەسىنىڭ ولىمىنە قاتىستى سوت پروتسەسى باستالىپ، ەسكەندىر سۇلەيمەنوۆ قازا تاپقان جول اپاتى بويىنشا سوتتالۋشى ماليكا مۇحيتوۆا مارقۇمنىڭ اتا-اناسىنان كەشىرىم سۇراعان ەدى.