ەركە ەسماحاننىڭ «ماحاببات كافەسى» فيلمى كورەرمەنگە جول تارتتى

استانا. قازاقپارات -  تانىمال ءانشى ەركە ەسماحاننىڭ پروديۋسەرلىگىمەن تۇسىرىلگەن فيلم كورەرمەنگە جول تارتتى. «ماحاببات كافەسى» دەپ اتالاتىن كومەديالىق تۋىندىدا كۇرە جول بويىنداعى كافەدە بولعان قىزىقتى وقيعالار سۋرەتتەلەدى.

 بيىلعى ماۋسىمدا تۇسىرىلگەن جاڭا كينوتۋىندىلاردىڭ قاتارىنا كومەديا جانرىنداعى «ماحاببات كافەسى» اتتى فيلم قوسىلدى. كۇرە جولدىڭ بويىندا ورنالاسقان كافەدە بولعان شىتىرمان وقيعا تۋرالى تۋىندىنىڭ باس پروديۋسەرى جانە نەگىزگى ءرولدىڭ ءبىرىن ويناعان - ەركە ەسماحان. بۇل - تانىمال ءانشىنىڭ كينو الەمىندەگى تىرناقالدى جۇمىسى.

ەركە ەسماحان، «ماحاببات كافەسى» فيلمىنىڭ باس پروديۋسەرى:

- حالىقتىڭ قازىرگى سۇرانىسى قانداي، سونى ويلادىق. ىشىندە وي سالاتىن دۇنيەلەر بار. كينوداعى باستى ءرولدىڭ ءبىرى - شىڭعىستى ءشارىپ سەرىك وينايدى. مۇندا اسپاز جىگىتتىڭ باسىنان وتكەن شىتىرمان وقيعالار سۋرەتتەلەدى. ياعني جول بويىنداعى ءدامحاناعا بەيتانىس جىگىت اسپاز بولىپ جۇمىسقا ورنالاسادى. ءدامحانا يەسىنىڭ قىزى ماقپالمەن تانىسىپ، سەزىم وتى تۇتانادى. الايدا جاس اسپازدىڭ كوپتەن جاسىرعان قۇپياسى كەيىن بەلگىلى بولادى.

كينوتۋىندىدا قازاقتىڭ ۇلتتىق تاعامدارى كەڭىنەن ناسيحاتتالادى. فيلمنىڭ رەجيسسەرى اسقار ۇزابايەۆ 17 كۇندە تۇسىرىلگەن كينوكومەديا كورەرمەننىڭ كوڭىلىنەن شىعادى دەگەن سەنىمدە. «ماحاببات كافەسى» 25 - قازاننان باستاپ «Kinopark 11 Imax Esentai»  كينوتەاترىندا كورسەتىلەدى.

www.24.kz