فۋتبول الەمدەگى ءنومىرى ءبىرىنشى سپورت ءتۇرى مە؟

استانا. قازاقپارات - فۋتبول تۋرالى ءسوز بولعاندا ونى كوككە كوتەرىپ «ءنومىرى ءبىرىنشى سپورت ءتۇرى» دەيمىز. بۇل شىندىققا قانشالىقتى جاقىن؟

الەمدە ءنومىرى ءبىرىنشى سپورت ءتۇرى ونىڭ كورەرمەندەرى مەن ونىمەن اينالىساتىن سپورتشىلار سانى بويىنشا ەڭ جوعارى دارەجەگە يە بولۋى كەرەك ەمەس پە؟ فۋتبول سونشالىقتى دەڭگەيدە مە؟

ءبىز حالىق سانى كوپ مەملەكەتتەردى نەگىزگە الا وتىرىپ، وسى سۇراقتاردىڭ توڭىرەگىندە ىزدەنىپ كورەتىن بولامىز.

قىتاي (حالىق سانى 1430075000)

قىتايدا فۋتبولدى جاقسى كورەدى. ءبىراق ونى وسى مەملەكەتتەگى ءنومىرى ءبىرىنشى سپورت ءتۇرى دەپ اتاۋعا كەلمەيدى. باسقا ەلدەردە «ستول تەننيسى»، ال قىتايلىقتار «پينگ-پونگ» دەپ اتايتىن سپورت ءتۇرى - جەرگىلىكتى تۇرعىنداردىڭ سۇيىكتى ويىنى.

سونىمەن بىرگە، ەركىن كۇرەس، يوگا، كۋنگ-فۋ دا ولاردىڭ سۇيىكتى ءحوببيى. قىتايدا سىيىمدىلىعى وتە ۇلكەن فۋتبول ستاديوندارىن سالىپ تاستاعانىمەن، وعان كورەرمەندەر كوپ بارا بەرمەيدى.

جانكۇيەرلەردى تارتۋ ماقساتىندا قىتايلىق كلۋبتار جىل سايىن تانىمال فۋتبولشىلاردى ءوز كلۋبتارىنا ترانسفەرلىك جولمەن اكەلۋگە تىرىسادى. ارينە مۇنىڭ ارتىندا قوماقتى قارجى مەن بيزنەس تۇرعانىن ۇمىتپاۋ كەرەك.

ءۇندىستان (حالىق سانى 1339180000)



ءۇندى ەلىندە فۋتبول اسا تانىمال سپورت ءتۇرى دەپ ايتا المايمىز. ءۇندىستاندىقتاردىڭ ەكىنشى دۇنيەجۇزىلىك سوعىستان كەيىنگى فۋتبول بويىنشا الەم چەمپيوناتىنا جالاڭاياق قاتىسۋعا بولمايتىندىعى سەبەپتى باس تارتقانى تۋرالى جازعان ەدىك.

تەك ءۇندىستان ەمەس، حالىق سانى بويىنشا جوعارى ورىنداردا تۇراتىن پاكىستان (208 ميلليون ادام) مەن بانگلادەشتە دە (175 ميلليون ادام) ەشقانداي سپورت ءتۇرى كريكەتتىڭ الدىنا تۇسە المايدى.

كريكەتپەن تانىلعان سپورتشىلار بۇل ەلدەردە ناعىز جۇلدىز جانە حالىق قاھارماندارى بولىپ ەسەپتەلەدى.

ا ق ش (حالىق سانى 328 ميلليون)




الەمدەگى ەڭ باي، بارلىق بوسقىندار بارۋدى ارماندايتىن بۇل ەلدە فۋتبولدى «سوككەر» دەپ اتايدى.

العاشىندا بۇل ويىن فۋتبولدان ازداپ وزگەشە بولعان -  30 مينۋتتان تۇراتىن 3 تايم، دوپ اۋتتان قولمەن ەمەس، اياقپەن سالىناتىن بولعان.

فۋتبول ا ق ش- تا ەشقاشان ءنومىرى ءبىرىنشى سپورت ءتۇرى بولماعان، ءتىپتى، الدىڭعى ۇشتىككە دە ەنبەگەن. ەسەسىنە امەريكالىقتار حوككەيدى جاقسى كورەدى. بۇل ەلدە باسكەتبول ويىندارىن دا ءسۇيىپ تاماشالايتىن جانكۇيەرلەر وتە كوپ.

بۇرىن NBA جۇلدىزدارى العان گونورارلار فۋتبولشىلاردىڭ تۇسىنە دە كىرمەيتىن. سونىمەن بىرگە، امەريكالىقتاردىڭ سۇيىكتى سپورت ءتۇرىنىڭ ءبىرى -  بوكس. ءبىراق بۇلاردىڭ بارلىعى تانىمالدىلىعى جاعىنان امەريكا فۋتبولىمەن تەڭدەسە المايدى.

فۋتبول، رەگبي تاعى باسقا ويىنداردىڭ بىرىككەن ءتۇرى بولاتىن، بۇل سپورت ءتۇرىن ۇنەمى كورىپ جۇرگەن ادام بولماسا، اناۋ-مىناۋ ادام تۇسىنە بەرمەيدى. ءبىر ماۋسىمى وتە قىسقا بولسا دا، ترانسلياتسيالار رەيتينگىندە قاشان دا جوعارى ورىنداردان كورىنەدى.

اسىرەسە، فينال ويىندارى امەريكالىقتار ءۇشىن - مەرەكە.

يندونەزيا (حالىق سانى 266,5 ميلليون)





بۇل ەلدە فۋتبول ايتارلىقتاي دامىماعان. جەرگىلىكتى تۇرعىندار اراسىندا «بادمينتون» ويىنى تانىمال. جاستار «پەنچاك سيلات» دەپ اتالاتىن جەكپە-جەك ونەرىمەن اينالىسقاندى جاقسى كورەدى. وسى سپورت تۇرىنەن حالىقارالىق ارەنالاردا جەتىستىكتەرگە كوپ جەتەدى.

جاپونيا (حالىق سانى 126,5 ميلليون)



 جاپوندار فۋتبولدى جاقسى كورەدى جانە وزدەرى دە جاقسى وينايدى. كۇنشىعىس ەلىنىڭ وكىلدەرى بىرنەشە رەت الەم چەمپيوناتتارىندا دوپ تەپكەن.

ءوز ەلىندە دە فۋتبول بويىنشا الەم چەمپيوناتىن وتكىزگەن. اسىرەسە، سوڭعى رەسەيدە وتكەن ءا چ 2018 دە سول كەزدەگى چەمپيون اتاعىنداعى نەمىس كومانداسىن 2:0 ەسەبىندە ۇتىپ كەتۋىنىڭ ءوزى سەنساتسيا بولدى.

وسىنداي جەتىستىكتەرىنە قاراماي ۇلتتىق ءداستۇردى قاتتى ۇستاناتىن ەلدە «سۋمو» كۇرەسىنە تەڭ كەلەتىن سپورت ءتۇرى جوق. بۇل ەلدەگى اناۋ-مىناۋ سپورتشىلار «سۋمو» جۇلدىزدارىمەن تەڭەسە المايدى.

بۇدان باسقا، اۆستراليا، جاڭا زەلانديا سياقتى ەلدەردە «رەگبي» ءبىرىنشى ءنومىرلى سپورت ءتۇرى بوپ ەسەپتەلەدى. سكانديناۆيا، رەسەي ەلدەرىندە حوككەي فۋتبولدان گورى تانىمال. ال، لاتىن امەريكاسىنىڭ كوپتەگەن مەملەكەتتەرىندە، اسىرەسە كۋبالىقتار ەشقانداي سپورتتى بوكسقا ايىرباستامايدى.

ءتىپتى، فۋتبولدىڭ وتانى ەۋروپادا دا «فورمۋلا 1»، «كورريدا» سىندى سپورتتىڭ جانكۇيەرلەرى وتە كوپ. ستاتيستيكادان بايقاعانىمىزداي، الەمنىڭ جارتىسىندا فۋتبول ءنومىرى ءبىرىنشى سپورت ءتۇرى ەمەس.

ءبىراق اتالعان ەلدەردە دە فۋتبولدىڭ جانكۇيەرلەرى كۇن ساناپ ارتىپ كەلەدى. جىل سايىنعى ترانسلياتسيالار، سەنساتسيالىق ترانسفەرلەر، ەموتسياعا باي ويىندار، ميلليونداعان تۋريستەردى تارتاتىن الەم چەمپيوناتى فۋتبولدىڭ تارالىپ، تانىمالدىلىققا جەتۋىنە ءوز ۇلەسىن قوسىپ جاتىر.

Massaget.kz