يسپانيا ءومىر ءسۇرۋ ۇزاقتىعى رەيتينگىندە جاپونيانى باسىپ وزباقشى
«ۇزاق جىلدار بويى جاپونيا ءومىر ءسۇرۋ ۇزاقتىعى بويىنشا الدا كەلەدى. دەگەنمەن، جاقىندا بۇل ورىنعا يسپانيا جايعاساتىن بولادى. بۇكىل الەمدىك ەكونوميكالىق فورۋمنىڭ باسەكەگە قابىلەتتىلىك تۋرالى جاھاندىق بايانداماسىندا دا يسپانيا حالقىنىڭ دەنساۋلىعى كۇننەن كۇنگە جاقسارىپ كەلە جاتقانى ايتىلادى. ال سوڭعى جۇرگىزىلگەن زەرتتەۋدە يسپانياداعى ءومىر ءسۇرۋ ۇزاقتىعى الەم بويىنشا ءبىرىنشى ورىنعا شىعاتىنى جازىلعان. سونداي- اق العاشقى وندىققا سينگاپۋر، شۆەيتساريا، پورتۋگاليا، يتاليا، يزرايل، فرانتسيا، ليۋكسەمبۋرگ، اۆستراليا كىرەدى» ، دەلىنگەن ماقالادا.
اۆتوردىڭ ايتۋىنشا، زەرتتەۋ بارىسىندا 195 مەملەكەتتىڭ مالىمەتتەرى ەسكەرىلگەن ەكەن.
ال جاپونياعا كەلەتىن بولساق، ول ەلدە ەندى جاس انالاردىڭ جۇمىس ىستەۋىنە ءمان بەرە باستاپتى. ايتا كەتەرلىگى، وسى كۇنگە دەيىن جاپونيا بالالى ايەلدەردىڭ جۇمىس ىستەۋىنە قولايسىز مەملەكەت سانالىپ كەلگەن ەدى. ال The New York Times جاريالاعان ماقالادا بۇگىنگى تاڭدا بۇل كوزقاراستىڭ وزگەرىپ جاتقانى جازىلىپتى.
ماقالا جارتى كۇن جۇمىس ىستەيتىن بالالى جاس انا - حيرومي وتتسۋكيدىڭ وقيعاسىنان باستالادى. اپتاسىنا 15 ساعات قانا جۇمىس ىستەيتىن ونىڭ مانسابى وسكەن، ءبىراق ءوزىنىڭ ايتۋىنشا، كومپانيادا ونى جاقتىرمايتىندار قاتارى كوبەيگەن.
«سوڭعى جۇرگىزىلگەن زەرتتەۋلەرگە سەنسەك، بالاسى بار ايەلدەردىڭ 71 پايىزعا جۋىعى جۇمىس ىستەيدى. بۇل وسى كۇنگە دەيىنگى ەڭ ۇلكەن كورسەتكىش. دەگەنمەن، بۇل سان وتە ۇلكەن پروبلەمالاردى جاسىرىپ تۇر» ، دەپ جازادى باسىلىم.
ماقالا اۆتورىنىڭ ايتۋىنشا، بۇل پروبلەمالار ەر ادام مەن ايەلدەردىڭ ەڭبەكاقىسىنىڭ ءارتۇرلى بولۋىنا اسەر ەتىپ، ايەلدىڭ جۇمىس مانسابىنا كەرى اسەر ەتەدى.
«پرەمەر- مينيستر سيندزو ابە جاپونيانىڭ ەكونوميكاسىن قايتا جانداندىرۋ ءۇشىن بالالى ايەلدەردىڭ جۇمىس ىستەۋىنە مۇمكىندىكتەردى ارتتىراتىنىن ايتتى. دەگەنمەن، مەملەكەتتە بۇل باعىتتا پروگرەسس باياۋ ءجۇرىپ جاتىر. مىسالى، حيرومي جۇمىس ىستەيتىن Isana.net كومپانياسى ايەلدەرگە بالالارىن جۇمىس ورنىنا الىپ كەلۋگە رۇقسات بەرەدى. ءبىراق مەملەكەت بويىنشا ونداي جاعداي كوپ جەردە جاسالماعان. ءبىر جاعىنان، مەملەكەتتە قىزمەتكەرلەر ازايىپ جاتقاندىقتان، بالالى ايەلدەردىڭ جۇمىسقا تۇرۋ كورسەتكىشى ارتا بەرۋى مۇمكىن» ، دەپ جازىلعان ماقالادا.
