استانانى گازداندىرۋ مەرزىمدەرى قانداي؟

استانا. قازاقپارات - «استانا قالاسىن گازداندىرۋ» بويىنشا مەملەكەتتىك ساراپتاما جۇرگىزۋ ءۇشىن تەحنيكالىق-ەكونوميكالىق نەگىزدەمە جاسالىپ، ازىرلەندى.

ونىڭ ناتيجەسى «مەملەكەتتىك ساراپتاما» رەسپۋبليكالىق مەملەكەتتىك كاسىپورنىنا جىبەرىلدى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

قورىتىندىنى الۋدىڭ بولجامدى مەرزىمى - 2018-جىلدىڭ ءتورتىنشى توقسانى. استانا قالاسىندا گاز تاراتۋ جەلىلەرىنىڭ قۇرىلىسى تەحنيكالىق-ەكونوميكالىق نەگىزدەمەگە سايكەس ءۇش كەزەككە بولىنگەن.

گازداندىرۋ پروتسەسىن جەدەلدەتۋ ءۇشىن قازىرگى ۋاقىتتا تەحنيكالىق-ەكونوميكالىق نەگىزدەمەمەن ءبىر مەزگىلدە 9 ىسكە قوسۋ كەشەنىن قامتيتىن جوبانىڭ 1-كەزەگىنىڭ جوبالىق-سمەتالىق قۇجاتتاماسى ازىرلەنۋدە:

1-ىسكە قوسۋ كەشەنى - گاز بەرۋ 1-اۆتوماتتى گاز تاراتۋ ستانساسىنان (ا گ ت س) ج ە و-1 جانە ج ە و-3 كە جەتكىزىلەدى (سۋ جىلىتقىش قازاندىقتار جانە مازۋت قازاندارى)؛

2-ىسكە قوسۋ كەشەنى - گاز ا گ ت س-2 دەن ج ە و-2 گە بەرىلەدى (سۋ جىلىتقىش قازاندار)؛

ۇشىنشىدەن 6-ىسكە قوسۋ كەشەندەرى - گاز تاراتۋ جەلىلەرى كوكتال-1، كوكتال-2 تۇرعىن ءۇي الاپتارىنا دەيىن تارتىلادى؛

7-كەشەندى ىسكە قوسۋ - گاز تاراتۋ جەلىسى جەلەزنودوروجنىي تۇرعىن الابىنا جەتەدى؛

8-جانە 9-كەشەندەردى ىسكە قوسۋ - گاز تاراتۋ جەلىسى «وڭتۇستىك شىعىس» تۇرعىن الابىنا دەيىن تارتىلادى.

گازداندىرۋدىڭ 1-كەزەڭىنىڭ جوبالىق-سمەتالىق قۇجاتتاماسىن الۋدىڭ بولجامدى مەرزىمى - 2019-جىل ءبىرىنشى توقسانى.

«1-كەزەكتىڭ جوبالىق-سمەتالىق قۇجاتتاماسىنا مەملەكەتتىك ساراپتامانىڭ وڭ شەشىمىن العان سوڭ، اكىمدىك ق ر بيۋجەت كودەكسىنە سايكەس ەنەرگەتيكا مينيسترلىگىنە جوبانى قارجىلاندىرۋ ءۇشىن قاجەتتى قۇجاتتامانى باعىتتايتىن بولادى. 2021 جانە 2023-جىلدار ارالىعىنداعى 2-جانە 3-كەزەكتەگى گاز تاراتۋ جەلىلەرىنىڭ قۇرىلىسىن جەرگىلىكتى بيۋجەت، رەسپۋبليكالىق بيۋجەت، سونداي-اق جەكە ينۆەستيتسيالار ەسەبىنەن جۇزەگە اسىرۋ جوسپارلانعان»، - دەلىنگەن اكىمدىك اقپاراتىندا.

جوبانىڭ ەكىنشى كەزەگىن ىسكە اسىرۋ اياسىندا گاز تاراتۋ جەلىلەرىن ميچۋرينو، ينتەرناتسيونالنىي، كۇيگەنجار، تەلمان، پريگورودنىي، Garden Village جانە Family Village تۇرعىن الاپتارىنا جەتكىزۋ جوسپارلانعان.

ەسكە سالايىق، ەلباسى «بەس الەۋمەتتىك باستاماسىندا» ەلدى گازبەن قامتاماسىز ەتۋدى جالعاستىرۋدى تاپسىردى. قاراوزەك (قىزىلوردا وبلىسى) - جەزقازعان-قاراعاندى-تەمىرتاۋ-استانا باعىتىندا ماگيسترالدى گاز قۇبىرىن سالۋ جوباسى جۇزەگە اسىرىلادى. ەلوردانى گازعا كوشىرۋ زياندى قالدىقتاردىڭ اۋاعا تارالۋىن 6 ەسەگە نەمەسە جىلىنا 35 مىڭ تونناعا ازايتادى.

«استانا ەنەرگوسەرۆيس» ا ق استانا قالاسىن گازداندىرۋ باعدارلاماسىنىڭ جوباسىن قوعامدىق تالقىلاۋعا شىعارعانىن بۇعان دەيىن حابارلاعان بولاتىنبىز.