ەلباسى ايگىلى «نوكيا» كومپانياسىنىڭ تەحنولوگيالارىمەن تانىستى
كومپانيانىڭ سوڭعى جەتىستىكتەرىمەن ەلباسىن «نوكيانىڭ» باس ديرەكتورى رادجيۆ سۋري تانىستىردى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.
«ءبىز سيفرلىق تەحنولوگيالاردا الەمنىڭ جەتەكشى ەلدەرىنىڭ ءبىرى سانالاتىن قازاقستانمەن ىنتىماقتاستىقتى جانداندىرا تۇسكىمىز كەلەدى. بەسىنشى بۋىننىڭ تەحنولوگيالارىن لوگيستيكادا، اقىلدى قالالاردا، تەحنولوگيالار جەلىسىندە قالاي پايدالانۋ قاجەتتىگىن جاقسى بىلەمىز. بەسىنشى بۋىن تەحنولوگياسى راديوسپەكتردىڭ تومەن، ورتاڭعى جانە جوعارى سالاسىندا بولىنىسكە ءتۇسۋى ءتيىس. ولاردىڭ بارلىعى دا تەحنولوگيالاردىڭ تابىستى پايدالانىلۋى ءۇشىن ءبىر مەزەتتە ورنالاستىرىلۋى قاجەت»، - دەدى ول.
ال «قازاق تەلەكوم» ا ق-نىڭ باسقارما ءتوراعاسى قۋانىشبەك ەسەكەيەۆ وسىدان جارتى جىل بۇرىن «نوكيا» كومپانياسىمەن قازاقستان اۋماعىندا 5G جەلىسىن سىناقتان وتكىزۋ تۋرالى كەلىسىمگە قول قويىلعانىن اتاپ ءوتتى.
«ءىس جۇزىنە كەلگەندە مۇنداي سىناقتان وتكىزۋ جۇمىسىن قولعا الۋدى باستاعان ەڭ ءبىرىنشى ەلمىز. شانحايدا وتكەن ۇيالى بايلانىس كونگرەسىندە بۇل جايىندا ۋاعدالاستىق. ءقازىر ەكى نۇكتەنى سىناقتان وتكىزۋدەمىز. ونىڭ ءبىرى استانا قالاسى مەن اقمولا وبلىسىندا، ەكىنشىسى الماتى وبلىسىندا ورنالاسقان»، - دەپ اتاپ ءوتتى قۋانىشبەك ەسەكەيەۆ.
ەستەرىڭىزگە سالا كەتسەك، بۇگىن ەلباسى فينليانديا پرەزيدەنتى ساۋلي نيينيستيەمەن شاعىن جانە كەڭەيتىلگەن قۇرامدا كەزدەسۋ وتكىزدى.
كەزدەسۋدەن كەيىنگى بىرلەسكەن مالىمدەمە بارىسىندا نۇرسۇلتان نازاربايەۆ قازاقستان- فينليانديا بيزنەسمەندەرى 600 ميلليون دوللاردىڭ كەلىسىمشارتىن جاساسقانىن، قازاق پەن ءفيننىڭ تاريحى دا، تاعدىرى دا ۇقساس ەكەندىگىن، ەلىمىزدىڭ كولىك الەۋەتى زور ەكەندىگىن باسا ايتتى.
ساپار اياسىندا مەملەكەت باسشىسى كەشە فين بيزنەس كاپيتاندارىمەن جۇزدەستى.
كەزدەسۋ بارىسىندا مەملەكەت باسشىسى فينليانديادان قازاقستان ارقىلى قىتايعا جاڭا تەمىر جول باعدارى اشىلاتىندىعىن ايتتى جانە فين كومپانيالارىن ەلىمىزدەگى اگروونەركاسىپتىك كەشەندەگى جوبالاردى جۇزەگە اسىرۋعا شاقىردى.
سونداي-اق فين كومپانيالارى ءۇشىن قازاقستاننىڭ تۋريزم سالاسى دا تارتىمدى ەكەنىن، IT- كومپانيالارىنا دا قولايلى جاعداي جاسالاتىندىعىن اتاپ ءوتتى.
