ەمير بايعازيننىڭ فيلمى «ازيالىق وسكار» بايقاۋىنا قاتىسىپ جاتىر
قازاقستاندىق رەجيسسەر ەمير بايعازيننىڭ «وزەن» فيلمى «رەجيسسۋراداعى تابىستار» نوميناتسياسىنان كورىنىپ وتىر. 12- Asia Pacific Screen Awards جۇلدەسىنىڭ جەڭىمپازدارىن اۋستراليانىڭ بريسبەن قالاسىندا 29 - قاراشادا جاريالايتىن بولادى.
ايتا كەتسەك، ەمير بايعازين 2013 -جىلى «اسلاننىڭ ساباقتارى» فيلمى ءۇشىن وسى اتالىمدا باق سىناپ، كينوجۇلدەنىڭ جوعارى باعاسىنا يە بولعان (Hight commendation) ەدى.
ودان بولەك، «وزەن» فيلمى لوس- اندجەلەستە وتەتىن Asian World film festival كينوفەستيۆالىنىڭ كونكۋرستىق باعدارلاماسىنا قاتىسادى. سونداي- اق، اتالعان كينوتۋىندى ۆارشاۆاداعى جانە سان پاولوداعى فەستيۆالدىڭ ارنايى باعدارلامالارىندا كورسەتىلەدى. ال «وزەن» فيلمىنىڭ ازيالىق تۇساۋكەسەرى ۇستىمىزدەگى جىلى 25 - قازان مەن 3 - قاراشادا توكيوداعى حالىقارالىق كينوفەستيۆالدىڭ كونكۋرستىق باعدارلاماسى شەڭبەرىندە وتەدى.
«وزەن» فيلمىنە قاتىستى جاڭالىقتار مەنى جانە مەنىڭ كوماندامدى ارينە قۋانتادى. وسى ورايدا، كومانداما العىسىمدى بىلدىرگىم كەلەدى. ولار تەك ماعان ەمەس، سونىمەن قاتار مەنىڭ يدەيالارىما قاشان دا ادال. سونداي- اق، ماعان قولداۋ كورسەتىپ، سەنىم بىلدىرگەن مادەنيەت جانە سپورت مينيسترلىگىنىڭ باشىلىعىنا العىس ايتامىن. بولاشاقتا دا قارىم- قاتىناستارىمىز نىعايىپ، ورتاق تابىستارعا قول جەتكىزەتىنىمىزگە سەنىمدىمىن» ، - دەدى رەجيسسەر.
ايتا كەتەرلىگى، «وزەن» فيلمىنىڭ الەمدىك تۇساۋكەسەرى ۆەنەتسيا كينوفەستيۆالى شەڭبەرىندە وتكەن بولاتىن.
ەسكە سالا كەتسەك، بۇعان دەيىن ەمير بايعازيننىڭ «وزەن» فيلمى گولليۆۋدتىك باسپا ءسوز قاۋىمداستىعىنىڭ گرانتىن العان بولاتىن.
