تۇركىستاندا تۇيەشىلەردىڭ حالىقارالىق جارىسى وتەدى
26 -قازان كۇنى شاردارا سۋ قويماسىنىڭ جاعالاۋىندا ۇيىمداستىرىلاتىن شارادا قوناقتار قىزىلقۇم ءوڭىرىنىڭ تابيعاتىمەن كەڭىنەن تانىسىپ، ءتۇرلى ويىن-ساۋىقتار مەن سپورتتىق جارىستاردى تاماشالايتىن بولادى، دەپ حابارلايدى قازاقپارات ءتىلشىسى.
ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا وتكىزىلەتىن فەستيۆالدە اۆتوكولىكتەردىڭ قۇمداعى جارىسى مەن كومپوزيتسيالىق «Rock racing» شوۋى ۇيىمداستىرىلادى. سونداي-اق قوناقتار تۇيەشىلەر جارىسىن، بۇركىت پەن قارشىعاعا قۇس ءىلدىرىپ، تۇلكى سالدىرعان ساياتشىلاردىڭ حالىقارالىق سايىسىن تاماشالايدى. بۇدان وزگە، موتوبايكەرلەردىڭ موتوكروسس ونەرى، جەلكەندى قايىق جارىسى، اكادەميالىق ەسۋ ءتۇرى، جاعاجاي ۆولەيبولى مەن فۋتبول جارىستارى، بالىق اۋلاۋ سايىسىن وتكىزۋ جوسپارلانعان.
سونىمەن قاتار، سايىپقىراندار قازاقشا كۇرەس، گىر تاسىن كوتەرۋ، بورەنەگە ورمەلەپ شىعۋ، قوشقار كوتەرۋ سەكىلدى سپورت تۇرلەرىنەن باق سىنايتىن بولادى.
«Safari Shardara» فەستيۆالىندە ايگىلى ونەر جۇلدىزدارى مەن ءان-بي انسامبالدەرى، سيرك ونەرپازدارى مەن اكروباتتار ونەر كورسەتەدى دەپ كۇتىلۋدە.
