دانيار اقىشەۆ يپوتەكا تۋرالى: اركىم شاماسىنا قاراۋى كەرەك
«يپوتەكا دەگەنىمىز - ءاربىر ازاماتتىڭ ءوز مۇمكىندىگىن سارالاۋى كەرەكتىگىن بىلدىرەدى. ازامات 25 جىل بويى نەسيە تولەگىسى كەلە مە؟ ءيا، ستاۆكانى تومەندەتىپ، جۇكتەمەنى ازايتتىق. ەگەر پاتەردىڭ باعاسى 10 ميلليون تەڭگە بولسا، تولەنۋى ءتيىس ايلىق تولەم 57 مىڭ تەڭگەگە تەڭ. مۇندا سونداي-اق، 2 ميلليون تەڭگەلىك العاشقى جارنانى سالۋ كەرەك. ال العاشقى جارنا بەرىلگەننەن كەيىن جوعارىدا اتالعان سومانى 25 جىل بويى تولەۋ كەرەك بولادى»، - دەدى ۇلتتىق بانك ءتوراعاسى ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرىپ.
دانيار اقىشەۆ سونىمەن قاتار، مۇنداي زايمدى رەسىمدەۋ ءۇشىن قاجەتتى ازاماتتاردىڭ تومەنگى كىرىسى تۋرالى دا ءسوز قوزعادى.
«ول ءۇشىن ءسىزدىڭ ايلىعىڭىز شامامەن 112 مىڭ تەڭگە بولۋى كەرەك. كەز كەلگەن جەكە تۇلعاعا نەسيە بەرگەن كەزدە بانكتەر وسى تاجىريبەنى ۇستانادى. دەمەك، قارىز جۇكتەمەسى ازاماتتاردىڭ ايلىعىنىڭ 50 پايىزىنان اسپاۋى ءتيىس. بولماعان جاعدايدا الگى ادام بار اقشاسىنا قارىزىن جاپسا، ءوزى قالاي ءومىر سۇرەدى؟ مەنىڭ ويىمشا، ادامدار ءوز مۇمكىندىگىن ناقتى ەسەپتەي الاتىنداي وتە ىڭعايلى امال ۇسىنىلىپ وتىر»، - دەيدى ق ر ۇلتتىق بانك ءتوراعاسى.
ءسوز سوڭىندا دانيار اقىشەۆ ءاربىر ازاماتتى ءوز مۇمكىندىگىن ءجىتى ەسەپتەپ، ساراپتاپ الۋعا شاقىردى.
«كەلەشەكتە ماسەلە تۋىنداماستاي شەشىم قابىلدانۋى كەرەك دەگەن ويدامىن. ادامدار قارىزدى الۋىن الىپ، كەيىن «تولەي الماي جاتىرمىز، قانداي دا ءبىر جەڭىلدىك كورسەتسەڭىزدەر» دەمەيتىندەي بولماۋى ءتيىس. ۇلتتىق بانك مەملەكەت باسشىسىنىڭ اۋزىنان شىققان جەڭىلدىكتەردەن باسقا ەشبىر جەڭىلدىكتى ەنگىزىپ وتىرعان جوق»، - دەدى دانيار اقىشەۆ.
ەسكە سالا كەتسەك، بۇعان دەيىن ۇكىمەت وتىرىسىندا دانيار اقىشەۆ «7-20-25» باعدارلاماسى بويىنشا استاناعا جاقىن ايماقتاردا يپوتەكانىڭ شەكتى باعاسى كوتەرىلگەنىن ءمالىم ەتكەن بولاتىن.