قازاق پوەزياسى مەن پروزاسىنىڭ اراب تىلىندەگى انتولوگياسى جارىق كورەدى
بۇل تۋرالى بۇگىن ق ر سىرتقى ىستەر مينيسترلىگىندەگى بريفينگتە قازاقستانىڭ مىسىرداعى توتەنشە جانە وكىلەتتى ەلشىسى ارمان يساعاليەۆ ايتتى، دەپ حابارلايدى قازاقپارات ءتىلشىسى.
«جەرگىلىكتى حالىق اراسىندا قازاقستانعا قىزىعۋشىلىقتىڭ تۋىنداۋىنا ۇلكەن سەپتىگىن تيگىزىپ وتىرعان «رۋحاني جاڭعىرۋ» باعدارلاماسىن ەرەكشە اتاپ ءوتۋ قاجەت. وسى جىلى اتالعان جوبا اياسىندا ءبىرقاتار ءىس- شارالار ۇيىمداستىردىق. اتاپ ايتقاندا، ءىلياس ەسەنبەرليننىڭ «كوشپەندىلەر» تريولوگياسىن اراب تىلىنە اۋدارىپ، بارلىق كىتاپحانالارعا سىيلادىق. 2019 -جىلى ەلشىلىكتىڭ دەمەۋىمەن قازاق پوەزياسى مەن پروزاسىنىڭ اراب تىلىندەگى انتولوگياسىن باسىپ شىعارامىز جانە ونىڭ بارلىق اراب ەلدەرىنە تارالۋىنا ىقپال جاسايمىز» ، - دەدى ەلشى.
سونىمەن قاتار ول اعىمداعى جىلدىڭ ساۋىرىندە الەكساندريا جانە كاير قالالارىندا الەمگە ايگىلى مۋزىكانت ايمان مۇساقوجايەۆانىڭ باسشىلىعىمەن «قازاق» ەلى كلاسسيكالىق كونسەرتى وتكەنىن ايتتى. مۇنان بولەك، قازاق مۋزىكانتتارىنىڭ كونسەرتتەرى مىسىردىڭ وپەرا ۇيلەرى مەن تەاترلارىندا ۇيىمداستىرىلعان. «رۋحاني جاڭعىرۋ» باعدارلاماسى اياسىندا كوپتەگەن ماقالالار جاريالانىپ، دەرەكتى فيلمدەر، سۇحباتتار ۇيىمداستىرىلعان.
«قازىرگى كەزدە «قازاق حاندىعى» تەلەحيكاياسى اراب تىلىنە اۋدارىلىپ، مىسىر تەلەارنالارىندا كورسەتىلەتىن بولادى. جالپى العاندا، «رۋحاني جاڭعىرۋ» باعدارلاماسى ءبىزدىڭ ەلىمىزگە دەگەن قىزىعۋشىلىقتى ودان ارى ارتتىرا ءتۇستى. ەلىمىزگە تۋريستەر مەن ينۆەستورلاردىڭ اعىلۋىنا سەپتىگىن تيگىزىپ جاتىر» ، - دەدى ارمان يساعاليەۆ.