بايقوڭىردان ۇشقان عارىش كەمەسى اپاتقا ۇشىرادى

 بايقوڭىر. قازاقپارات - 2018 -جىلعى 11 - قازان كۇنى 14 ساعات 40 مينۋت 15 سەكۋندتا بايقوڭىر عارىش ايلاعىنىڭ گاگارين ستارت الاڭىنان وربيتاعا باسقارىلاتىن كولىكتىك «سويۋز مس-10» كەمەسىن الىپ شىعۋى ءتيىس «سويۋز فگ» زىمىران تاسىعىشى ۇشىرىلدى، دەپ حابارلايدى «قازاقپارات» ح ا ا ءتىلشىسى.

ءبىراق ستارت بەرىلگەن سوڭ بىرنەشە مينۋتتان كەيىن روسكوسموس سايتىنداعى تىكەلەي كورسەتىلىم ءۇزىلىپ، ديكتور «زىمىران تاسىعىشتىڭ اپاتقا ۇشىراعانىن» حابارلادى.

«سويۋز مس-10» كەمەسىنىڭ بورتىندا روسكوسموس عارىشكەرى الەكسەي وۆچينين مەن NASA عارىشكەرى نيك حەيگ بار.

رەسەي عارىش سالاسى وكىلدەرىنىڭ ايتۋىنشا، ەكيپاج امان، اپاتتىق تۇردە شامامەن قازاقستان اۋماعىنا قونادى.

قازعارىش قىزمەتكەرلەرىنىڭ «قازاقپارات» حالىقارالىق اقپارات اگەنتتىگىنە مالىمدەۋىنشە، بايقوڭىردا اپاتتىق جاعداي جونىندەگى كوميسسيانىڭ وتىرىسى ءوتىپ جاتىر. ونىڭ قورىتىندىلارى كەيىنىرەك بەلگى بولادى.