جاھاندانۋ زامانىندا جاستار ءۇشىن ايقاسۋعا تۋرا كەلەدى - ەپيسكوپ گەننادي
«قازىرگى كەزەڭ وسى عاسىردىڭ باسىنداعى ومىرگە مۇلدە ۇقسامايدى. الەممەن بىرگە ادامدار دا قاتتى وزگەرىپ بارادى. ءبىز بۇل وزگەرىستەردى جاستاردىڭ ءومىرىن باقىلاي وتىرىپ، ايقىن بايقايمىز. اقپاراتتىق تەحنولوگيالاردىڭ ءداۋىرى كەلدى. وتكەن عاسىردىڭ الپىسىنشى جىلدارى مەن ەڭ كوپ وقيتىن فيلوسوف، تەڭدەسسىز ويشىل مارشالل ماكليۋەننىڭ ءسوزىن كەلتىرگىم كەلەدى. ول «ەلەكتر شىنجىرى ۋاقىت پەن كەڭىستىكتى جويادى» دەگەن ەدى، - دەدى گەننادي كاسكەلەنسكي الەمدىك جانە ءداستۇرلى دىندەر كوشباسشىلارىنىڭ VI سەزىنىڭ پانەلدىك وتىرىسىندا.
ونىڭ ايتۋىنشا، گادجەتتەرگە دەگەن تاۋەلدىلىككە اۋىلداردىڭ وزدەرى دۋشار بولعان.
«رەسەيدە وزەن جاعاسىنداعى كوركەم اۋىلداردىڭ بىرىنە بارعانىمدا قاتتى ويلاندىرىپ تاستاعان ءبىر جاعدايعا تاپ بولدىم. نەگىزى، وسىناۋ ساياجايلى اۋىلعا وسىدان 10 جىل بۇرىن دا بارعانمىن. شۋلاعان بالالاردىڭ كوپتىگى سونشا، وڭاشادا ەركىن دۇعا ەتۋدىڭ، جۇمىس ىستەۋدىڭ ءوزى قيىنعا سوققانى ەسىمدە. بۇكىل كوشەلەردە بالالار تولىپ جۇرەتىن. مىنە، سول اۋىلعا ون جىلدان كەيىن كەلىپ، كوشەدە بىردە- ءبىر بالانى كەزدەستىرە المادىم. كوشەدەگى ەگدەلەۋ ءبىر كىسىدەن «بالالار قايدا؟ » دەپ سۇراسام، بالالار نەگىزى بۇرىنعىدان دا كوپ ەكەنىن، الايدا ولار كوشەگە شىعىپ ويناۋعا گادجەتتەر مەن كومپيۋتەردەن قولدارى بوساماي جاتقانىن ايتتى» ، - دەيدى ول.
ونىڭ ايتۋىنشا، بالالار قازىرگى زاماندا ۆيرتۋالدى الەمنىڭ تۇتقىنىنا اينالعان.
«ترانسگۋمانيزمنىڭ يدەولوگتارى ويعا كىرمەيتىن وزگەرىستەردىڭ كەلە جاتقانىن ايتادى. ماسەلەن، نەيروكومپيۋتەرلىك جەلى كومپيۋتەر مەن ادامنىڭ ميىن جالعاستىرا الاتىنىن ايتادى. ءارى قاراي نە بولماق؟ ءبىز ءاربىر ادامنىڭ باسىنا كەلەتىن وزگەرىستەردىڭ الدىندا تۇرمىز. اقپاراتتىق تەحنولوگيالاردىڭ، ءتىپتى بەس- التى جىل بۇرىنعى ۇلگىلەرىن قازىرگىمەن سالىستىرا المايسىز. قازىر ينتەرنەت جاڭا مادەنيەتتى قۇرا الاتىنداي دارەجەگە جەتتى» ، - دەيدى ەپيسكوپ.
مىنە، سوندىقتان قازاقستاننىڭ پراۆوسلاۆ شىركەۋ ىستەرى جونىندەگى جەتەكشىسىنىڭ ايتۋىنشا، جاھاندانۋ زامانىندا جاستار ءۇشىن ايقاسقا تۇسۋگە تۋرا كەلەدى.
ەسكە سالا كەتسەك، الەمدىك جانە ءداستۇرلى دىندەر كوشباسشىلارىنىڭ VI سەزى استانادا كەشە باستالعان بولاتىن. القالى جيىنعا بارلىق الەمدىك جانە ءداستۇرلى دىندەردىڭ وكىلدەرى، سونىمەن قاتار بەدەلدى ءدىني ليدەرلەر، ساياسي قايراتكەرلەر مەن حالىقارالىق ۇيىم وكىلدەرىنەن قۇرالعان 46 ەلدەن 82 دەلەگاتسيا قاتىسۋدا.