ديماش لوندونداعى كونسەرتتەن تۇسكەن قاراجاتتى جاس تالانتتاردىڭ يگىلىگىنە جۇمساماق

 استانا. قازاقپارات - قازاق ءانشىسى ديماش قۇدايبەرگەن انگليادا وتەتىن كونسەرتتەن تۇسكەن قاراجات قازاقستاننىڭ جاس تالانتتارىنىڭ حالىقارالىق ماڭىزدى بايقاۋلارعا قاتىسۋىن قولداۋعا جۇمسالاتىنىن جاريا ەتتى، دەپ حابارلايدى قازاقپارات ءتىلشىسى.

ەسكە سالا كەتسەك، ديماش قۇدايبەرگەن انگلياداعى ايگىلى «Royal Festival Hall» زالىندا جەكە كەشىن وتكىزەتىنىن كەشە حابارلاعان ەدىك.

بۇگىن ءانشى ءوزىنىڭ ينستاگرام پاراقشاسىندا كونسەرتكە قاتىستى بارلىق رەسمي اقپارات @kazauenderi اككاۋنتىندا جاريالاناتىنىن جازدى.

«ۋادە ەتىلگەندەي، مەن سىزدەرگە ۇلى بريتانياداعى قازاقستان مادەنيەتى كۇندەرى اياسىندا 19 -قاراشا كۇنى لوندوندا قايىرىمدىلىق ماقساتتا وتەتىن كونسەرتىم جونىندە اقپارات بەرەمىن. كوممەرتسيالىق ەمەس كونسەرتتىڭ ۇيىمداستىرۋشىسى - قازاقستان رەسپۋبليكاسىنىڭ مادەنيەت جانە سپورت مينيسترلىگى. شارا ۇلى بريتانياداعى قازاقستان رەسپۋبليكاسى ەلشىلىگىنىڭ قولداۋىمەن وتەدى. جينالعان بارلىق قاراجات قازاقستاننىڭ جاس تالانتتارىن حالىقارالىق ماڭىزدى بايقاۋلارعا قاتىستىرۋدى قولداۋ ءۇشىن جۇمسالادى. كونسەرت وتەتىن «Royal Festival Hall» مەكەمەسى تىركەۋ جۇرگىزۋمەن اينالىسپايدى. كونتسەرتكە قاتىستى بارلىق رەسمي اقپارات @kazauenderi اككاۋنتىندا» ، - دەپ جازدى ول ءوزىنىڭ ينستاگرام پاراقشاسىندا.