يادرولىق سىناقتار ءۇشىن فرانسيانىڭ ۇستىنەن سوتقا شاعىم ءتۇستى

بريۋسسەل. قازاقپارات - گااگاداعى حالىقارالىق قىلمىستىق سوتقا پولينەزيادا جۇرگىزىلگەن يادرولىق سىناقتار سالدارىنان ادامزاتقا قارسى جاسالۋى مۇمكىن قىلمىستار ءۇشىن فرانسيانىڭ ۇستىنەن تالاپ- ارىز ءتۇستى.

 بۇل تۋرالى سەيسەنبى كۇنى فرانسيالىق پولينەزيانىڭ بۇرىنعى پرەزيدەنتى وسكار تەمارۋعا سىلتەمە جاساپ فرانس پرەسس اگەنتتىگى حابارلادى.

«بويىمىزدى بورىش پەن باتىلدىق سەزىمى كەرنەگەن ءبىز 2 - قازان كۇنى حالىقارالىق قىلمىستىق سوتقا ادامزاتقا قارسى جاسالعان قىلمىس ءۇشىن شاعىم تۇسىردىك» ، - دەپ كەلتىرىلگەن و. تەمارۋدىڭ سوزدەرى.

«بۇل ءىس ەلىمىزگە قارسى يادرولىق سىناقتار ءۇشىن جاۋاپتى بولعان فرانسيانىڭ قازىرگى كەزدە كوزى ءتىرى بارلىق پرەزيدەنتتەرىن جاۋاپقا تارتۋعا باعىتتالعان» ، - دەپ قوسىپ ءوتتى ول.

فرانسيادا 1960-1996 -جىلدار ارالىعىندا 210 يادرولىق سىناق جۇرگىزىلگەن، سونىڭ ىشىندە 17 سى الجير اۋماعىنداعى ساحارا شولىندە، 193 فرانسيالىق پولينەزيانىڭ فانگاتاۋفا جانە مۋرۋروا اتولدارىندا (ءىنجۋ ارالدارى) بولدى.

 سىناقتار سالدارىنان بىرنەشە مىڭداعان ادامنىڭ دەنساۋلىعى ناشارلادى. فرانسياعا قارسى شاعىمدار تۇسىرگەن شامامەن مىڭ ادامنىڭ جيىرماسىنا جۋىعىنا عانا كومپەنساتسيا تولەندى.