قازاق جۋرناليستيكاسىنىڭ قابىرعاسى كۇيرەپ ءتۇستى - نامازالى وماشيەۆ
جيىن ءبىر مينۋت ۇنسىزدىكپەن باستالدى جانە وندا قالامگەردىڭ ءومىرى مەن شىعارماشىلىعى، قوعامداعى ءرولى اڭگىمەلەندى.
«قازاق جۋرناليستيكاسىنىڭ قابىرعاسى كۇيرەپ ءتۇستى دەۋگە بولادى. ويتكەنى، قازاق جۋرناليستيكاسىندا شەرحانداي كوپ جۇك كوتەرگەن، كوپ شاكىرت تاربيەلەگەن، جۋرناليستيكاعا شىعارماشىلىق ۇلەس قوسىپ، بەدەلىن اسپانعا كوتەرگەن ادام از. بۇل كىسى جازسا دا، سويلەسە دە ۇلگى ەدى. ءىسى مەن ءسوزى بىردەي، مىنەزى مەن جازۋى قابىسقان ادام. بىرەۋلەر جازۋعا شەبەر بولسا دا، ءىسى ورايلاسپاي جاتادى. بىرەۋلەر ىسكەر بولسا دا، جازۋى كەلىسپەي جاتادى. شەرحان شىعارماشىلىعى مەن ادامي قاسيەتى بىردەي ادام بولدى، سونىسىمەن وزگەلەرگە ۇلگى ەدى. مۇنداي تۇلعانى جوعالتۋ - ۇلت ءۇشىن ورنى تولمايتىن ۇلكەن قايعى» ، - دەدى بەلگىلى جۋرناليست، اكادەميك نامازالى وماشيەۆ.
ونىڭ ايتۋىنشا، شەرحاننىڭ ومىردەن وزۋى قازاق جۋرناليستيكاسىنا عانا ەمەس، تۇتاس حالىققا اۋىر ءتيىپ وتىر.
«قازاق حالقى ءوزىنىڭ اسىل ۇلىنان ايىرىلدى. شەراعاڭدى بىلمەيتىن قازاق كەمدە- كەم. شىعارماشىلىقتا عانا ەمەس، ءوزىنىڭ ادال مىنەزىمەن، قايسارلىعىمەن، تاباندىلىعىمەن ەلدىڭ رۋحىن كوتەرگەن، ۇلتىن بيىككە سۇيرەگەن، الاش ارىستارىنىڭ مىنەز- قۇلقىن بويىنا ءسىڭىرىپ، باسىن بايگەگە تىككەن قازاق ومىردەن ءوتتى» ، - دەدى اكادەميك.
سونىمەن بىرگە، جۋرناليست كەلەشەكتە شەرحان شىعارماشىلىعىنىڭ كەمەلدەنە تۇسەتىنىن جەتكىزدى.
«شەرحاننىڭ ماڭگىلىك عۇمىرى باستالدى. تاۋ سياقتى الىستاعان سايىن جازعان دۇنيەلەرى بۇرىنعىدان دا كەمەلدەنىپ، بيىكتەي تۇسەتىنى انىق. قازاق حالقى، قازاق جۋرناليستيكاسى، قازاق ادەبيەتى تۇرعاندا، شەرحاندار بيىكتەي بەرەدى. قابىلان مىنەز قايسار اعامىزدىڭ توپىراعى تورقا، جاتقان جەرى جايلى ءجاننات بولسىن» ، - دەدى ن. وماشيەۆ.
ەسكە سالا كەتسەك، قالامگەر كەشە شامامەن 18:30 دا الماتى قالاسىندا اۋىر ناۋقاستان قايتىس بولدى.
شەرحان مۇراتازامەن قوشتاسۋ ءراسىمى 11 - قازان كۇنى ساعات 10.00 دە م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا وتەدى. جازۋشى كەڭساي زيراتىنا جەرلەنەدى.
جازۋشى قىركۇيەك ايىندا 86 جاسقا تولعان ەدى.