قازاقستاندىق مينيسترلەر قانداي كوستيۋم كيەدى

None
None
 الماتى. قازاقپارات - ەگەر ۇستەرىڭىزدەگى شەتەلدىك كيىمدى شەشىپ الساق، تىر جالاڭاش قالاسىڭدار!

وسى كۇنگە دەيىن وتاندىق وندىرىسكە نەمقۇرايلى قاراپ كەلگەن ۇكىمەتتىڭ جۇمىسىن پرەزيدەنت وسىلاي سىنادى جۋىرداعى جولداۋدا. ەلباسىنىڭ سوزىنە كوز جەتكىزۋ ءۇشىن ءبىزدىڭ تىلشىلەر مينيسترلەر كابينەتىنىڭ مۇشەلەرىنىڭ قانداي كوستيۋم كيىپ جۇرگەنىن زەرتتەپ كوردى.

بۇل تۋرالى ەۋرازيا ءبىرىنشى ارناسى حابارلايدى.

ەت-ءسۇت ونىمدەرىن الاردا وتاندىق تاۋاردى ىزدەيمىز. قولدىڭ ءسۇتى، ءوز جەرىمىزدە جايىلعان مالدىڭ ەتىن جەگىمىز كەلەدى. ال كيىم- كەشەك، تۇرمىستىق تەحنيكاعا كەلگەندە شەتەلدىڭ زاتىن الۋعا، تانىمال برەندكە قۇمارمىز.

«سىزدەردىڭ ۇستەرىڭىزگە كيگەن شەتەلدىك كوستيۋمدەرىڭىزدى شەشىپ الساق، جالاڭاش قالاسىڭدار. ءبىزدىڭ ەلىمىزدە دە ساپالى كيىم شىعارا الادى. مەن ءوزىم تەك وتاندىق ءونىمدى قولدانامىن. ساپالى ءارى ون ەسە ارزان. ءوزىمىزدى قولداۋ كەرەك!» - دەدى ق ر پرەزيدەنتى نۇرسۇلتان نازاربايەۆ.

ەگەر جوعارىدان بۇيرىق كەلىپ، شەنەۋنىكتەردى شەشىندىرىپ الاتىن بولساق، ەرلان ساعادييەۆتەن باسقاسى جالاڭاش قالۋى مۇمكىن. ءبىلىم سالاسىنداعى رەفورمالارمەن باسى قاتىپ جۇرسە دە باس مۇعالىم وتاندىق كوستيۋمدى كيەدى ەكەن.

«مىنە، وتاندىق كوستيۋم. QLP. الماتىدا جاسالعان» - دەيدى ق ر ءبىلىم جانە عىلىم ءمينيسترى ەرلان ساعاديەۆ.

وتاندىق ءونىمدى قولداۋعا بولىنگەن قارجى، ەل ەكونوميكاسىنىڭ احۋالىن ەربولات دوسايەۆتەن ارتىق ەشكىم بىلمەيتىن شىعار. قانشا جىلدان بەرى ۇكىمەتتىڭ اينالاسىندا ءجۇر. ءبىراق گاردەروبىندا بىردە ءبىر وتاندىق كيىم جوق ەكەن.

«يمپورت، ءالى كورگەن جوقپىن» - دەدى ق ر پرەمەر- ءمينيسترىنىڭ ورىنباسارى ەربولات دوسايەۆ.

«ءبىزدىڭ ءوندىرىس» - دەدى ق ر پرەمەر-ءمينيسترىنىڭ ورىنباسارى اسقار جۇماعاليەۆ.

«كەيبىر كەزدە ەلدەن الامىز، كەيبىردە شەتەلگە كومانديروۆكاعا بارعاندا الامىز. ەندى ەلباسى ايتقاننان كەيىن ءبىزدىڭ وندىرۋشىلەرگە كوڭىل بولە باستايمىز» - دەيدى اقپارات جانە كوممۋنيكاتسيالار ءمينيسترى داۋرەن ابايەۆ.

«مەن وسى جەردە تىگەمىن استانادا. يمپەراتورسكيي دوم بار عوي، سول جەردە» - دەيدى مادەنيەت جانە سپورت ءمينيسترى ارىستانبەك مۇحامەدي ۇلى.

نۇرسۇلتان ماعزوموۆ بيزنەس سالاسى بويىنشا شەتەلدە ءبىلىمىن شىڭداپتى. جات جەردە ءجۇرىپ وزگە جۇرتتىڭ كيىم ۇلگىسىندەگى تالعامىن بايقاعان. ەلگە كەلگەن سوڭ ءدال سونداي وتاندىق برەند تاۋارىن شىعارۋعا بەل بۋعان. ءقازىر قازاقستان بويىنشا 10 بۋتيگى بار. ءتىپتى رەسەيدەن دە اشىپتى.

«ماسكەۋدەن كەلگەن كەزدە يمپورتتىق كوستيۋمدەردىڭ قىمبات ەكەنىن بايقادىق. ال ارزان باعاداعى كيىم ۇنامادى. سودان سوڭ وسىنى نەگە ءوزىمىز تىگىپ المايمىز دەگەن وي كەلدى. باسىندا ون شاقتىسىن تىگىپ كيىپ العان كەزدە قىزىققاندار، سۇراي باستاعاندار كوبەيدى» - دەيدى كاسىپكەر نۇرسۇلتان ماعزوموۆ.

سولاردىڭ بىرىنە ءبىز دە بارىپ كوردىك. كوستيۋمدەردىڭ باعاسى 75 مىڭ تەڭگەدەن باستالادى. سەبەبى، ەلدە تىگىلگەنىمەن، ماتەريال سىرتتان كەلەدى. مىنا تاۋاردىڭ ءبارى وتاندىق ءونىم ەكەن.

مىنە، كيىنىپ شىقتىم. ۇستىمدەگىنىڭ ءبارى وتاندىق ءونىم. مىنا كوستيۋم 99 مىڭ، كويلەك 11 مىڭ. بەلبەۋ 12 مىڭ، گالستۋك 9 مىڭنان باستالادى. سوندا تۇتاس كيىنىپ شىعۋ ءۇشىن 130 مىڭ تەڭگەدەن اسا قارجى كەتەدى. ەگەر اياق كيىم الساڭىز، تۋفليلەر 37 مىڭ تەڭگەدەن تۇر. ەسەپتەي بەرىڭىز.

تەك قانا شەنەۋنىكتەردەن ەمەس، قاراشا حالىقتان دا سۇراپ كوردىك.

«مەن نەگىزى كلاسسيكانى ۇناتامىن. شەتەلدىك برەندتەردەن ماعان كوبىنەسە H/M- نەن كيەمىن. ال، قازاقستانداعى ديزاينەرلەردىڭ كيىم ساپاسى تومەن. باعاسى جوعارى».

«قازىر قازاقستاندىق برەند الۋ ءتيىمدى. شەتەلدىكىن الساڭ ءونىم قىمبات بولىپ كەلەدى. ال قازاقستاندىقتىڭ ماتاسى قىمبات بولسا دا، قولعا ءتيىمدى».

«مەنىڭ تۋفليىم دە، كوستيۋمىم دە وتانىق ءونىم. مەن قازاقستاندىق جەڭىل ونەركاسىپتىڭ تولىق جارناماسىمىن»، - دەيدى ەلباسى جولداۋى كەزىندە.

پرەزيدەنت بيىل عانا ەمەس، بۇعان دەيىن دە ماسەلەنى كوتەرىپ ءجۇر. ءبىراق جولداۋدا ايتىلماعان سوڭ، ۇكىمەتتەگىلەر اسا نازار اۋدارماعان سياقتى. ەندى ناقتى تاپسىرما بەرىلدى. الداعى ءۇش جىلدا وڭدەۋ ونەركاسىبى مەن مەن شيكىزاتتىق ەمەس ەكسپورتتى قولداۋ ءۇشىن قوسىمشا 500 ميلليارد تەڭگە بولىنبەك.

 

سوڭعى جاڭالىقتار