سۇراعى جوق سۇحبات. شەرحان مۇرتازا

None
None
 استانا. قازاقپارات - ۋاقىت - ماڭگىلىك. ماڭگىلىك باستالمايدى دا، اياقتالمايدى دا.

بايلىق ءوز قولىمىزدا. ءبىراق، ءبۇيىرىمىز نەگە تومپايمايدى؟ قارنىمىز قابىرعامىزعا نەگە قابىسىپ قالدى؟ وسىلاي دەي باستاساڭ باسشىلار اشۋلانادى. ويتكەنى، ولار ەل ارالاپ ءجۇرىپ وتكەن جەردىڭ ءبارى جايناپ تۇر. ەل توق، كيىم كوپ، جۇرت تىنىش، كۇندە دۋمان، كۇندە توي. مۇنىڭ اتىن «پوتەمكين دەريەۆنياسى» دەيدى.

شەكسپيردىڭ دانالىعى ەسكە تۇسەدى: «قىلمىستى التىنمەن كومكەرىپ قويساڭ، زاڭنىڭ نايزاسى مايىسىپ قالادى» . كوك سوققاندا، ءبىزدىڭ نايزالارىمىز اسىرەسە مايىسقاق كەلە مە دەپ سەسكەنەمىن.

قازىر مەن «ەگەمەنبىز، تاۋەلسىزبىز» دەگەن شىرىن سوزدەرگە بۇرىنعىداي ماساتتانبايتىن بولىپ بارامىن. ول ول ما، ازاتتىق العانىمىزعا دە سەنىم ازايدى. الماتىدا جۇرسەم دە شەتەلدە جۇرگەن سياقتىمىن. قالا تولى جارناما. بۇرىن ورىسشاسى كوپتە - ەپتەپ ءتۇسىنۋشى ەدىم، ەندى نە جازۋ ەكەنىن مۇلدە تۇسىنبەيمىن.

سامايعا اق كىرىپ ەدى، مۇرت تا اعارا باستادى. ۇيالعان ۇرىداي بولىپ قاستىڭ ءبىر تالى دا اعارىپتى. سويتە- سويتە.. . سۇيەك تە اعارادى- اۋ.. .

ۋاقىتتى جىلعا، ايعا، ساعاتقا، مينوتكە، سەكوندكە، عاسىرعا ءبولىپ جۇرگەن ادامدار عوي. ۋاقىت - ماڭگىلىك. ماڭگىلىك باستالمايدى دا، اياقتالمايدى دا.

تەمىردى تات شىرىتەدى. تات تەمىردىڭ وزىنەن شىعادى. ادامدى ازدىراتىن جامان قىلىقتار دا وزىڭنەن شىعادى. ول دا تات.

«جەر- انا» دەگەن ۇلى ۇعىم ورىستاردا دا بار. ءبىراق سويتە تۇرا، سول انانى باعىندىرامىز! - دەدى. ەسىندە مە سول ۇران؟ ءبىزدىڭ گازەتتەردىڭ انشلاگى، ماڭدايشاسى بولاتىن. باقانداي- باقانداي ارىپتەرمەن تەرىلەتىن. و زاماندا - بۇ زامان، ءوز اناسىن باعىندىراتىن ادام بولا ما ەكەن؟ ! ءسويتىپ، ۇلى انامىزدىڭ كويلەگى جىرتىلدى، ومىراۋى ايعىز- ايعىز بولدى. ءجۇز جىلدىق جارا ءتۇستى.

ءبىزدىڭ كەزىمىزدە «اسىق ويناعان ازادى، دوپ ويناعان توزادى» دەپ، ويىنعا جولاتپايتىن. كەرى ناسيحات جۇرگىزىپ، كەرى تاربيە بەرەتىن. اسىق ويناساڭ، دوپ ويناساڭ، شىنىعاسىڭ دەيتىن زامان جوق ول كەزدە.

ادەبيەتتىڭ مۇراتى قاي كەزەڭدە دە - بىرەۋ. ول - حاقيقاتقا قيانات قىلماۋ!

ۆاححابيزم دەگەن بالە بۇيرەكتەن سيراق شىعارىپ جۇرەدى، ولار ماعان مۇلدە ۇنامايدى. وندايلاردى قالاي دەپ ايتۋعا بولاتىنىنا تەڭەۋ، ءسوز تاپپاي وتىرمىن.

نامىسشىل ەكەنىم راس مىناۋ تىرشىلىكتىڭ وزىندە. اۋىر ءسوز ايتىلسا، بىرەۋ داتتاپ، بالاعاتتاپ جاتسا، نامىستاناتىنىم راس.

ارامقولدى ادام ەش ۋاقىتتا جۋرناليست بولىپ جارىتپايدى.

قۇداي اسىقپايدى: بۇل دۇنيە بولماسا، و دۇنيە بار؛ زاۋال ايتەۋىر ءبىر سوعار.

كونە تۇرىك سۇلتاندارىنىڭ سالتى: ساراي اقىنىنىڭ ولەڭدەرى ۇناسا، اۋزى تولعانشا التىن ءتىللا اساتادى. ۇناماسا، اۋزى تولعانشا جىلقىنىڭ تەزەگىن اساتادى. قازىرگى اقىن- جازۋشىلارعا دا وسى ءادىستى قولدانسا، ادەبيەت شىڭعا شىعار ەدى.

تۇرار، ميلليونداردى ستاليندىك- گولوشەكيندىك اشتىق اجالىنان ارپالىسا اراشالاعان تۇرار رىسقۇلوۆ اقىر سوڭىندا ءوزى اشتان ولگەن؟ ! ادىلەت قايدا، اتاسىنا نالەت! تىم بولماسا مولاسى دا جوق. شىڭعىس حاننىڭ مولاسىن وسى ۋاقىتقا دەيىن تولىپ جاتقان زەرتتەۋشىلەر تابا الماي كەلەدى. ال حالىقتى اشتىق قىرعىننان ساقتاپ قالعان رىسقۇلوۆتىڭ مولاسىن كىم ىزدەيدى؟ !

سوندا بۇل دۇنيە، ءوزىڭ بەس- اق كۇن قوناق بولساڭ، نەسى قىزىق؟ قىزىق ەتۋ، ءسىرا، اسا دارىندى سيرەك ادامداردىڭ عانا قولىنان كەلەتىن بولار.

كىتاپتى سۇيمەگەن قۇدايدى دا سۇيمەيدى.

ماداقتاساڭ دا، قارعاساڭ دا جارىق دۇنيە دەگەن - وسى. جارىق دۇنيەگە ەشكىم ءوز ەركىمەن كەلمەيدى. تاعدىر ايداپ كەلە قالسا، وعان اتا- اناسى، جاناشىر، جاقىندارى قۋانادى. شاماسى كەلسە، تويحانا جاسايدى. بەسىك تويى، تۇساۋكەسەر تويى، تاعى- تاعىلار ءومىر بويى جالعاسىپ بارىپ، جانازامەن ءتامام- تاۋىس بولادى.

پاريجدە بولدىم - پاريج تۇسىمە كىرمەدى. مىسىردا بولدىم - مىسىر تۇسىمە كىرمەدى. قىتاي، موڭعولستان، ءۇندىستان، پاكىستان، يران باردىم. مۇحيتتىڭ ارعى بەتىندەگى تەحاستا، چيكاگودا، نيۋ- يوركتا بولدىم - ولار دا تۇسىمە كىرمەدى. باياعىدا ماسكەۋدە بەس جىل وقىدىم - ونى دا تۇسىمدە كورمەدىم. تۇسىمدە ىلعي بالالىق شاعىمدى كورەمىن. تۇسىمە كۇن سايىن مىڭبۇلاق كىرەدى. تۇسىمدە اقسۋ- جاباعىلىنى كورەمىن. تۇسىمە ىلعي ايشا كىرەدى.

انامنىڭ اتى ايشا ەدى.

Baq.kz

سوڭعى جاڭالىقتار