بالاعا مۋلتفيلم كورسەتۋ ەرەجەلەرى

 استانا. قازاقپارات -  مۋلتفيلمدەردىڭ پايداسى كوپ، ولار دۇرىس جانە مەيىرىمدى نارسەلەرگە ۇيرەتەدى. بالا مۋلتفيلمنەن دوستاسۋدى ۇيرەنەدى، وتباسىلىق قۇندىلىقتى باعالايدى، اياۋشىلىق ءبىلدىرۋدى، وزىنە سەنۋدى جانە باسقالارعا كومەكتەسۋدى مەڭگەرەدى.

 ءوزىڭىز قاراعان مۋلتفيلمدەردى ەسكە ءتۇسىرىڭىز، سۇيىكتى كەيىپكەرلەرىڭىزدى ويلاڭىز. بالالىق شاعىڭىزدىڭ كەيىپكەرلەرى مەن سول كەزدەگى كوڭىل كۇي ماڭگى ەستە قالادى. سوندىقتان بالاعا مۋلتفيلم قاراۋعا رۇقسات بەرۋ كەرەك. الايدا قازىر كونتەنت قولجەتىمدى بولعاندىقتان، مۋلتفيلم كورسەتۋدىڭ ناقتى ەرەجەلەرىن ەسكەرگەن ءجون.

 1. مۋلتفيلمدى بالامەن بىرگە كورۋ مۋلتفيلمدى بالامەن بىرگە كورۋدى ادەتكە اينالدىرىڭىز. قولىڭىز بوساماي جاتسا، بوس ۋاقىت بولعاندا عانا قوسىپ، بىرگە قاراڭىز. وكىنىشكە وراي، قازىر انالاردىڭ بارلىعى بالانى مۋلتفيلممەن الاڭداتىپ، وزدەرى شارۋالارىن بىتىرەدى. ونى بالامەن قاراۋ ماڭىزدى. بىرىنشىدەن، بالا قارايتىن كونتەنتتى باقىلاي الاسىز. سەبەبى، قازىر كىشكەنتاي بالانىڭ ءوزى youtube-تان ءوزى قالاعان مۋلتفيلمدى وڭاي تاۋىپ الادى. ەكىنشىدەن، بالا مۋلتفيلدەگى قانداي دا ءبىر ساتتەن قورقىپ كەتۋى مۇمكىن. سوندىقتان ونىڭ جانىندا بولا بولۋ كەرەك، ونىڭ نەدەن قورقاتىنىن، ۇيالاتىنىن بايقاپ وتىرىڭىز. اركەز مۋلتفيلم سيۋجەتى بالاعا تۇسىنىكتى بولىپ كەلمەيدى، سوندىقتان ونىڭ جانىندا بولىپ، تۇسىنبەگەن جەرىن ءتۇسىندىرىپ، انىقتاپ، نە نارسەگە ەكپىن قويىلعاندىعىن ايتىپ وتىرۋ كەرەك. ءسويتىپ، بالا داميدى، جاڭا نارسەلەرگە ۇيرەنەدى. سول كەزدە مۋلتفيلم قاراۋ جاي اۋەسقويلىق ەمەس، سونىمەن قاتار پايدالى ۋاقىت وتكىزۋگە اينالادى.

 2. مۋلتفيلدى كۇنىنە 1 ساعاتتان ارتىق قاراماۋ مۋلتفيلدى از ۋاقىتتان قاراعان جاقسى. بالا ۇزاق ۋاقىت ءبىر نارسەگە قاراپ وتىرعاندا كوزىن سيرەك جۇمادى، سونىڭ سەبەبىنەن كوزدىڭ مۇيىزگەك قابىعى ىلعالدانبايدى جانە كوز شارشايدى. سونىمەن قاتار، مۋلتفيلمدەگى جىلدام اۋىسقان كادرلار، سۋرەتتەر جانە مونتاج سەبەبىنەن مي جۇمىسى باياۋلايدى. بالالاردىڭ كىشكەنتاي كەزىندە ميى بەلسەندى دامۋى كەرەك. ال ۇزاق ۋاقىت مۋلتفيلم قاراۋ كەرىسىنشە، ولاردىڭ دامۋىن باياۋلاتادى. سوندىقتان كۇندە مۋلتفيلمنىڭ ءبىر سەرياسىن نەمەسە ءبىر شاعىن ءتۇرىن كورسەتكەن ءجون. مىسالى، تاڭەرتەڭ بالاباقشاعا باراردا ءبىر سەرياسىن كورسەتىپ، ۇيىقتار الدىندا تاعى ءبىر سەرياسىن نەمەسە سۇيىكتى شاعىن مۋلتفيلىمىن كورسەتىڭىز.

 3. مۋلتفيلمدى جاسىنا قاراي تاڭداۋ مۋلتفيلم بالانىڭ قابىلداۋ قابىلەتىنە بايلانىستى جاسالادى. مىسالى، 3 جاسقا دەيىنگى بالالار سيۋجەتتى، كەيىپكەرلەردى تۇسىنە المايدى. ونداعى كوپ ەلەمەنتتەر ونىڭ كوزىن شارشاتادى. 2 جاستاعى بالالارعا ارنالعان مۋلتفيلمدەردەگى كەيىپكەرلەر جاي عانا شارلار بولۋى مۇمكىن. وندا پىشىندەر، مۋزىكا، قاراپايىم قوزعالىستار، بي بولادى. ەگەر بالاعا ءوزىنىڭ جاسىنان جوعارىعا ارنالعان مۋلتفيلم قوسساڭىز، ول ەشتەڭە تۇسىنبەي، بەكەرگە كوزى جانە باسى شارشايدى. 5 جاسقا دەيىنگى بالا 1,5 ساعات قوزعالماي، ءبىر ورىندا مۋلتفيلم قاراپ وتىرۋى - قالىپتى جاعداي ەمەس. مۇنداي جاستاعى بالا ءاردايىم قوزعالىستا بولىپ، مۋلتفيلم قاراۋعا قاتتى قىزىقپاۋى كەرەك. ەگەر مۋلتفيلنىڭ الدىندا قوزعالىسسىز وتىرا بەرسە، تاۋەلدىلىك پايدا بولعانىن جانە ونىڭ «جابىسىپ» قالعانىن بىلدىرەدى.

 4. زياندى مۋلتفيلمدەردى تىزىمنەن الىپ تاستاۋ زورلىق- زومبىلىق، توبەلەس، جازالاۋ، مازاق ەتەتىن جاعدايلار كورسەتىلگەن مۋلتفيلمدەردى كورسەتپەڭىز. سونىمەن قاتار، قايتالامالى ارەكەتتەر جاسالاتىن ۆيدەولاردى كورسەتپەڭىز، كوپشىلىك ولار بالاعا تۇستەردى اجىراتۋعا، ولاردىڭ قالاي اتالاتىندىعىن ۇيرەتەدى دەپ ويلايدى. نەگىزگى تۇستەردى، پىشىندەردى جانە ارىپتەردى بالاعا قاعازدان نەمەسە ويىنشىقتان كورسەتىپ، ءوزىڭىز ۇيرەتكەننەن تەز قابىلدايدى. ال مۇنداي ۆيدەولار جاي بالانى الاڭداتادى. سونىمەن قاتار، بۇل ۆيدەولاردىڭ دىبىسى جامان بولادى، قۇلاقتى اۋىرتادى. مۋلتفيلم بالانى الاڭداتۋعا ارنالعان ۆيدەو ەمەس، بالا ودان پايدالى نارسە الۋى كەرەك. مىسالى، ءسىز جاي الاڭداتاتىن نارسە قارايسىز با؟ جوق، ءسىز قىزىقتى ۆيدەو قارايسىز. قاراعان نارسەدەن پايدالى ماعلۇمات، جاقسى كوڭىل كۇي، جاڭا ءبىلىم الۋعا تىرىساسىز. ءسىز ۋاقىتىڭىزدى بولمايتىن نارسەگە جۇمساعىڭىز كەلمەيدى، سول سەكىلدى بالاڭىزدىڭ دا قىمباتتى ءار ساعاتىن بەكەرگە وتكىزبەڭىز.

 5. مۋلتفيلمدى ۇلكەن ەكراننان كورۋ مۋلتفيلمدى پلانشەت نەمەسە ۇيالى تەلەفوننان ەمەس، مۇمكىندىك بولسا، تەلەديداردان كورگەن دۇرىس. ەكران قانشالىقتى كىشى بولسا، بالانىڭ كوزى مەن ميى سونشالىقتى كوبىرەك كۇش سالادى. بولمە قاراڭعى، ءبىراق ەكران قاتتى جارىق بولعان كەزدە دە قاراماعان ءجون. مۋلتفيلمدى جولدا كورسەتپەۋ كەرەك. ءيا، بالا مىندەتتى تۇردە جىلايدى. قۇلاعىڭىز تىنىش بولۋ ءۇشىن امالسىز ۇيالى تەلەفوندى بەرىپ قوياسىز. ءبىراق بالا 3-4 ساعات بويى كىشكەنتاي ەكراننان باسىن الماي قاراپ وتىرسا، كوزى مەن باسى قاتتى اۋىرادى. ونىڭ ورنىنا ولەڭ ايتىپ، بيلەپ، قانداي دا ءبىر ويىندار ويناتقان نەمەسە ۇيىقتاتقان جاقسى. مۋلتفيلمنىڭ پايدالى تۇستارى كوپ. ەگەر ونى شەكتەۋلى ۋاقىت قاراسا، جاسىنا ساي تاڭدالسا، پايدالى ءتۇرى بولسا، ونىڭ ەش زيان بولمايدى. بالا مۋلتفيلم قارايتىن ۋاقىتتى اسىعا كۇتۋ كەرەك جانە ول ۋاقىت وعان قاتتى ۇناۋى كەرەك. باياعىدا ءوزىڭىزدىڭ مۋلتفيلمدى اسىعا كۇتكەن كەزىڭىزدى ەسىڭىزگە ءتۇسىرىڭىز. ۇيدە ناقتى ەرەجە ورناتىلسا، بالا دا سول تارتىپكە ۇيرەنەدى.

Massaget.kz