الماتى وبلىسىندا جىلدىڭ ۇزدىك ۇستازىنا كولىك كىلتى تابىس ەتىلدى

تالدىقورعان. قازاقپارات - الماتى وبلىسىندا «جىلدىڭ ۇزدىك ۇستازى» اتاعىن الما ماحانوۆا جەڭىپ الدى.

جامبىل اۋدانىنداعى ا. بەيسەۋوۆ اتىنداعى ورتا مەكتەپتىڭ اتىنان سىنعا تۇسكەن جەڭىمپازعا وبلىس اكىمى سۋ جاڭا اۆتوكولىكتىڭ كىلتىن تابىستادى، - دەپ حابارلايدى قازاقپارات ءتىلشىسى.

ەستەرىڭىزگە سالا كەتەيىك، وسىدان ەكى جىل بۇرىن ياعني 2016 -جىلى ءدال وسى نوميناتسيا جامبىل اۋدانىنا بۇيىردى. ءۇ. كارىبايەۆ اتىنداعى ورتا مەكتەپتىڭ بيولوگيا ءپانىنىڭ مۇعالىمى گۇلحان نۇرعازيەۆا بايقاۋدىڭ باس جۇلدەسىن قانجىعالاپ، اۆتوكولىك جەڭىپ العان بولاتىن.

بۇگىن تالدىقورعاندا مۇعالىمدەر كۇنى قارساڭىندا ءوڭىردىڭ ءبىلىم سالاسىنا ەڭبەگىن سىڭىرگەن ارداگەر، زەينەتكەر پەداگوگتار مەن وسى كۇندە جاستاردى ءبىلىم نارىمەن سۋسىنداتىپ، بار ءبىلىمى مەن بىلىكتىلىگىن ۇرپاق تاربيەلەۋ ىسىنە اياماي جۇرگەن ءبىر توپ ۇستازدار ماراپاتتالدى.

ماراپاتتالۋشىلار قاتارىندا «ق ر ءبىلىم بەرۋ ءىسىنىڭ ۇزدىگى» اتاعى مەن ق ر ءبىلىم جانە عىلىم مينيسترلىگىنىڭ «ى. التىنسارين اتىنداعى توسبەلگىسىنە» يە بولعاندار دا بولدى. سالتاناتتى شارا بارىسىندا قاراساي اۋدانىنداعى جامبىل اتىنداعى ورتا مەكتەپ «ۇزدىك اۋىلدىق مەكتەپ»، ال ەڭبەكشى قازاق اۋدانىنداعى مەكتەپكە دەيىنگى «بايتەرەك» مەكەمەسى «ۇزدىك بالاباقشا» دەپ تانىلدى.

قازىرگى تاڭدا وبلىسىمىزدىڭ ءبىلىم بەرۋ سالاسىندا 35 مىڭنان استام ادام ەڭبەك ەتۋدە. ءتۇرلى رەسپۋبليكالىق بايقاۋلاردا وبلىسىمىزدىڭ ۇستازدارى جوعارى ناتيجەلەر كورسەتۋدە. اتاپ ايتقاندا، «2018 -جىلدىڭ ۇزدىك مۇعالىمى» بايقاۋىندا الماتى وبلىسىنىڭ ءبىر توپ ۇستازدارى لايىقتى تۇردە «ۇزدىك پەداگوگ» اتاعىنا يە بولدى.