نەلىكتەن ۇنەمى ۇيقىڭىز كەلەدى؟

استانا قازاقپارات - «دەمالىس كۇندەرى ۇيقىمدى قاندىرىپ الامىن، سوسىن ءبارى جاقسى بولادى!»، - دەگەن ءسوزدى ىشىڭىزدەن ايتاتىن نەمەسە بىرەۋدەن ەستيتىن كەزدەر ءجيى بولادى.

كۇندىز ۇيقى قىسۋىنىڭ سەبەبى كوپ. اراسىندا كۇندىز ۇيقىڭىز كەلسە، ەشتەڭە ەمەس. الايدا، كۇندە قاتتى ۇيقىڭىز كەلە بەرۋىنىڭ سەبەبى نەدە؟ تۇندە قالىپتى 7-9 ساعات ۇيىقتاساڭىز دا، كۇندىز ۇيقىشىل بولىپ ءجۇرۋدىڭ بىرنەشە سەبەبى بولۋى مۇمكىن.

1. ۋايىمداۋ. ءاردايىم ۇيقىنىڭ كەلۋى ءومىردىڭ درامالىق جاعدايىنا اعزانىڭ قورعانىش رەاكتسياسى بولۋى مۇمكىن. قانداي دا ءبىر جاعدايدى ۋايىمداپ جۇرسەڭىز، تۇندە ۇيىقتاعانداي بولساڭىز دا، دەمالمايسىز. ەرتەڭگىسىن ەسەڭگىرەپ، ەشتەڭە ىستەمەسەڭىز دە شارشاپ جۇرەسىز.

2. دەنە سىمباتتىلىعىن ساقتاپ قالۋعا باعىتتالۋ. ءمىنسىز دەنە ءپىشىنىن جاساۋعا كومەكتەسەتىن ديەتالار مەن يدەيالاردىڭ سالدارى كۇندىزگى ۇيقىشىلدىققا اكەلەدى. ءاردايىم قانشا تاماق جەگەنىڭىزدى ساناۋ، ارتىق جەمەۋ كەرەكتىگىن ويلاپ وتىرۋ جانە قالاعانىڭىزدان باس تارتۋ پسيحولوگيالىق شارشاۋعا اكەلەدى. سودان سوڭ مىنسىزدىككە جەتە المايتىندىعىڭىز تۋرالى جامان ويلار كەلە باستايدى. باستىسى، «دۇرىس» تاماقتانۋ تۋرالى ۇمىتپاڭىز. اعزاعا جۇمىس ىستەۋ ءۇشىن كۇش كەرەك.

3. شىعارماشى. سوندىقتان شىعارماشىلىقپەن اينالىساتىن ادام ءوزىنىڭ جۇمىسىنىڭ، ءومىرىنىڭ ناتيجەسىن باعالاپ جۇرەدى. ازداپ ءۇزىلىس بولسا، ۋايىمداي باستايدى. ونى قورشاعان ادامداردىڭ ويى مازالايدى. مۇنداي ۋايىم اعزانى شارشاتادى. سوندىقتان اعزا قورعانىپ، ەنەرگيا ۇنەمدەۋ رەجيمىن قوسادى.

4. ءوز-ءوزىن تۇسىنبەۋشىلىك. بۇل كوبىنەسە سىرتتاي تابىستى ادامدارعا قاتىستى ورىن الادى. ولار ءبارى جاقسى بولسا دا، نەلىكتەن وزدەرىن ناشار سەزىنەتىنىن تۇسىنبەيدى. ارينە، ءبارى بىردەي ەمەس. ولار تابىس، سىرتقى ادەمىلىك جانە جاستىقتى باقىتتى ءومىردىڭ كەپىلى دەپ سانايدى. ولاي بولماعان جاعدايدا، ىشكى قاراما- قايشىلىق پايدا بولادى. ءومىرىنىڭ دۇرىستىعىنا، باقىتتى بولا الاتىندىعىنا كۇمان تۋىندايدى.

اينالاسىنداعى ادامداردىڭ «تويىنعانسىڭ» نەمەسە «ناعىز قايعىنى كورمەگەنسىڭ» دەگەن سوزدەرى ىشتەي وقشاۋلانۋعا اكەلەدى. ءوزىن تۇسىنبەۋشىلىكتەن پسيحولوگيالىق شارشاي باستايدى. بۇل جاعدايدا ءاردايىم ۇيقىنىڭ كەلۋى وزىنشە قورعانىش بولىپ سانالادى. كەي ادامدار تابىستى ادام ءتۇرىن جاساۋعا كوپ ەنەرگيا جۇمسايدى. ادام ءوز قۇندىلىقتارىن تاۋىپ، سونىڭ ارتىنان ءجۇرۋ كەرەك. بۇل ماسەلەنى وزدىگىنەن شەشۋ قيىن، سوندىقتان ارنايى مامانعا بارعان ءجون. ول ءسىزدىڭ ومىردەن ءلاززاتا الۋ قاسيەتىڭىزدى قايتارۋعا كومەكتەسەدى.

5. كۇيزەلۋ. كۇيزەلىستىڭ اعزاعا زيانى تۋرالى ءبارى بىلەدى، ءبىراق كۇندەلىكتى ومىردە ودان قاشۋعا تىرىساتىن ادامدار از. مىسالى، كەي ادامدار تەلەباعدارلاما نەمەسە سەريال قاراعاننان كۇيگەلەكتەنە باستايدى. ول كۇندە دەمالامىن دەپ ويلاپ، تەلەديداردى قوسادى، ءبىراق ناتيجەسىندە جۇيكە جۇيەسى قوزادى. كەلەسى كۇنى ادام نە بولاتىنىن بىلە تۇرا، سول تەلەديداردى قايتادان قوسادى. سول سەكىلدى الەۋمەتتىك جەلىدەگى «اقىلدى» جاريالانىمداردى وقۋدان كوپ پايدا تاپپايسىز. ونىڭ ورنىنا كىتاپ وقىپ، ويىڭىزدى داپتەرگە جازىپ وتىرۋ باسقاشا ۇدەرىس ەكەنىنە كەلىسەسىز بە؟ ءبىراق، ادام سول الەۋمەتتىك جەلىگە كىرىپ، لەنتانى ءبىر قاراپ شىقپاسا، ءوزىن الەمدە بولىپ جاتىرعان قىزىقتاردان قالىپ قوياتىنداي سەزىنەدى.

ال اعزا توقتاۋىڭىزدى سۇراپ، «قابىلداماۋ» رەجيمىن قوسىپ، بولىپ جاتىرعان جاعدايلارعا قىزىعۋشىلىقتىڭ جوعالۋىنا جانە ءاردايىم ۇيقىنىڭ كەلۋىنە اكەلەدى. قانداي جاعداي بولماسىن ادامعا دەمالىس قاجەت. ءاردايىم ءوزىڭىزدى ءۇزىلىسسىز ۋاجدەۋىشتەرمەن (موتيۆاتور)، ترەنينگتەرمەن جانە ەنەرگەتيكالىق سۋسىندارمەن ۇستاپ ءجۇرۋدىڭ قاجەتى جوق. ءوزىڭىزدى كۇتۋدى ۇيرەنگەن ءجون. ءومىرىڭىزدى باعالاڭىز!

 

دەرەككوزى: sᴛᴏᴡɴ.kz