قازاقستاندا پلاستماسسانى قوقىسقا كومۋگە تىيىم سالىنادى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا تۇرمىستىق قاتتى قالدىقتاردى قايتا وڭدەۋ جانە كادەگە جاراتۋ ماسەلەلەرى بويىنشا بايانداعان ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
«تۇرمىستىق قاتتى قالدىقتاردى قايتا وڭدەۋ ۇلەسىن ارتتىرۋ ءۇشىن قالدىقتاردى بولەك جيناۋدى ەندىرۋ، جەكە ينۆەستيتسيالار تارتۋ، سونىڭ ىشىندە مەملەكەتتىك- جەكەشەلىك ارىپتەستىك ارقىلى قالدىقتاردى قايتا وڭدەۋ سەكتورىن دامىتۋ بويىنشا جۇمىستار جۇرگىزىلۋدە. نورماتيۆتىك قۇقىقتىق بازا قۇرىلدى جانە جەتىلدىرىلىپ جاتىر» ، - دەدى مينيستر.
ونىڭ ايتۋىنشا، ەكولوگيالىق كودەكسكە قالدىقتارمەن جۇمىس جاساۋ بويىنشا تۇزەتۋلەر ەنگىزىلگەن.
«اتاپ ايتقاندا 2016 -جىلدان باستاپ پوليگونداردا قۇرامىندا سىناپ بار شامداردى جانە قۇرىلعىلاردى، مەتالل سىنىقتارىن، پايدالانىلعان مايلاردى جانە سۇيىقتىقتاردى، باتارەيكالاردى، ەلەكتروندى قالدىقتاردى كومۋگە تىيىم سالىندى. 2019 -جىلعى 1 - قاڭتاردان باستاپ پلاستماسسانى، ماكۋلاتۋرانى، كارتوندى جانە قاعاز قالدىقتارىن، اينەكتى، 2021 -جىلعى 1 - قاڭتاردان باستاپ - قۇرىلىس جانە تاماق قالدىقتارىن كومۋگە تىيىم سالاتىن نورما كۇشىنە ەنەدى» ، - دەدى قانات بوزىمبايەۆ.
