فرانسيا حالقى «وتىرار سازى» وركەسترىنىڭ ونەرىنە ءتانتى بولدى

None
None
استانا. قازاقپارات - «فرانسياداعى قازاقستان كۇزى» جالعاسۋدا، دەپ حابارلايدى «حابار 24» ءتىلشىسى.

 نۇرعيسا تىلەنديەۆتىڭ «وتىرار سازى» وركەسترى تالعامپاز فرانسۋزداردى ءوز ونەرىمەن باۋراپ، تاڭداي قاقتىرىپ ءجۇر. ەلدىڭ وڭتۇستىگىندەگى مونپەلە مەن كانن قالالارىندا وتكەن كونسەرتتەردە ينە شانشار ورىن بولعان جوق. ءتىلشىمىز جانات ەرنست كورەرمەندەرمەن بىرگە ۇلى دالا اۋەندەرىنە قۇلاق تۇرگەن ەدى.

نۇرعيسا تىلەنديەۆ اتىنداعى فولكلورلى- ەتنوگرافيالىق وركەستر فرانسۋزدىق ريۆەرادا. وسىلايشا كوپتىڭ كوڭىلىنەن شىققان قازاق جانە فرانسۋز كومپوزيتورلارىنىڭ اۋەنى تەڭىز جاعالاۋىندا شىرقالماق. بۇل وسىمەن اڭىزعا اينالعان وركەستردىڭ فرانسيادا ءوتىپ جاتقان ەكىنشى كونسەرتى. قازاق مۋزىكانتتارى «فرانسياداعى قازاقستان كۇزى» جوباسى اياسىندا ونەر كورسەتكەلى وتىر.

كورەرمەندەر كونسەرتتە قازاق كومپوزيتورلارى ىقىلاس پەن تۇركەش، نۇرعيسا تىلەنديەۆ، ەۆگەني برۋسيلوۆسكيدىڭ شىعارمالارىن تىڭداپ، دومبىرا، قوبىز، جەتىگەن، ساز- سىرناي سەكىلدى حالىق اسپاپتارىنىڭ ۇنىنە ءتانتى بولدى. سونداي- اق وركەستر بەلگىلى فرانسۋز مۋزىكانتتارى ميشەل لەگران مەن شارل ازناۆۋر شىعارمالارىن ورىنداعان. كانن قالاسىنىڭ تالعامپاز جۇرتشىلىعى قازاقستاندىق شەبەرلەردى زور قوشەمەتپەن قارسى الدى.

 جان عاليەۆ، قازاقستاننىڭ فرانسياداعى توتەنشە جانە وكىلەتتى ەلشىسى:

 - بۇگىندە فرانسۋزدار قازاقستاندى مادەنيەتى ارقىلى كوبىرەك تاني باستادى. سەبەبى حالىقتاردى جاقىنداستىراتىن دا ءدال وسى مادەنيەت عوي. ءبىز بيىل قازاقستان مەن فرانسيا اراسىندا ستراتەگيالىق سەرىكتەستىكتىڭ ورناعانىنا 10 جىل تولعانىن اتاپ ءوتىپ جاتىرمىز. «فرانسياداعى قازاقستان كۇزى» جوباسى وسى مەرەيتويعا جاساعان سىيىمىز. مادەني ماۋسىم اياقتالاتىن جەلتوقسان ايىنا دەيىن كوپتەگەن فرانسۋزدار ەلىمىزدى جاقسىراق تاني تۇسەتىنىنە ءۇمىتتىمىز.

توماس دە پاريەنتە، كانن قالاسىنىڭ ۆيسە- مەرى:

 - قازاقستان ءوزىنىڭ ۇزدىك شىعارمالارىن حالىقارالىق مادەنيەت پەن ءبىلىم ورتالىعى سانالاتىن كانن قالاسىندا ۇسىنىپ وتىرعانى -  ءبىز ءۇشىن ۇلكەن ابىروي. وسىنداي ەرەكشە كونسەرتتى وتكىزگەنىمىزگە وتە قۋانىشتىمىز.

فرانسۋز كورەرمەندەرى اتى اڭىزعا اينالعان «وتىرار سازى» وركەسترىن جىلى قارسى الدى. وركەستردىڭ ورىنداۋىنداعى شىعارمالار، ۇلتتىق اسپاپتاردىڭ اۋەزدىلىگى تىڭدارمانداردى باۋراعانى انىق. وسى كونسەرت قازاقتىڭ تاريحى، وزىندىك مادەنيەتى مەن تابيعاتىنان سىر شەرتكەندەي.

 دانيەل موريتتس، كانن قالاسىنىڭ تۇرعىنى:

- ءوز اسەرىمدى بىلدىرەتىن ءسوز تاپقان جوقپىن، تاڭ قالارلىق جاعداي. كونسەرتكە قايتا كەلگىم كەپ تۇر، وسى تاماشا مۋزىكا جازىلعان ديسكتى ساتىپ العىم كەلەدى.

دينارا تىلەنديەۆا، «وتىرار سازى» وركەسترىنىڭ ديريجەرى:

- «رۋحاني جاڭعىرۋ» باعدارلاماسىنىڭ ارقاسىندا وسىنداي كەرەمەت زالداردا ونەر كورسەتىپ ءجۇرمىز. نۇرسۇلتان ءابىش ۇلى «حالىق قاھارمانى» وردەنىن تابىس ەتكەندە، اكەمنىڭ اۋرۋحانادا ايتقان سوزدەرى ەسكە تۇسەدى. «ءالى دە حالقىمنىڭ الدىندا وتەلمەگەن پارىزىم بار، جازىلعاننان كەيىن وسىمەن اينالىسام» دەگەن ەدى. وكىنىشكە قاراي، ول دۇنيەدەن وزدى. قازاقستاندى الەمگە تانىتۋ تۋرالى اكەمنىڭ ارمانىن ورىندايمىن دەپ ويلايمىن.

كونسەرت اياقتالعانانان كەيىن جۇرت تىك تۇرىپ قوشەمەت كورسەتتى. ەندى قازاقستاندىق ونەر مايتالماندارى ماۋسىمنىڭ سوڭىنا دەيىن فرانسيادا تاعى دا بىرنەشە كونسەرت وتكىزۋدى جوسپارلاپ وتىر.

 اۆتورلارى: جانات ەرنست، جومارت احمەتوۆ

www.24.kz

سوڭعى جاڭالىقتار