جۇرگىزۋشىلەر ايىپپۇلدىڭ بار- جوعىن قالاي تەكسەرە الادى

استانا. قازاقپارات - اكىمشىلىك پوليتسيا كوميتەتى اۆتوكولىك يەلەرى ايىپپۇلدارى بار- جوعىن قالاي تەكسەرۋگە بولاتىنىن جانە ولارمەن كەلىسپەگەن جاعدايدا شاعىمدانۋ ءتارتىبىن ءتۇسىندىردى، دەپ حابارلايدى قازاقپارات.

 «اكىمشىلىك پوليتسيا كوميتەتى كولىك قۇرالدارىنىڭ يەلەرى «Egov.kz»  جانە «Qamqor.gov.kz» سايتتارىندا ايىپپۇلداردىڭ بار- جوعىن تەكسەرە الاتىنىن جانە كورسەتىلگەن سايتتار ارقىلى ونلاين رەجىمدە ايىپپۇلداردى تولەي الاتىنىن حابارلايدى. بۇل رەتتە، تولەم تۋرالى اقپارات ايىپپۇلدار بويىنشا ورتالىقتاندىرىلعان دەرەكتەر بازاسىنا اۆتوماتتى تۇردە كەلىپ تۇسەدى جانە كولىك يەسىنە ىشكى ىستەر ورگاندارىنا تولەم تۋرالى تۇبىرتەكتى قوسىمشا بەرۋدىڭ قاجەتتىلىگى جوق»، - دەپ اتاپ ءوتتى ۆەدومستۆودان.

سونداي- اق «Qamqor.gov.kz» سايتىندا ايىپپۇلدى تولەۋ قاجەتتىلىگى تۋرالى ۇيعارىمدى باسىپ شىعارۋعا بولادى. وندا ىشكى ىستەر ورگانى بولىمشەسىنىڭ تولەفون ءنومىرى جانە مەكەنجايى كورسەتىلگەن. سولار بويىنشا ماشينا يەسى قاجەت بولعان جاعدايدا تۇسىنىك الۋ ءۇشىن جۇگىنە الادى.

ەگەر جۇرگىزۋشى قۇقىقبۇزۋشىلىقپەن كەلىسپەسە اۋماق بويىنشا اكىمشىلىك پوليتسيا باسقارماسىنا ءتيىستى ءوتىنىشىن بىلدىرۋگە قۇقىلى. وندا ءوتىنىشتى قاراۋ جانە تەكسەرۋ ناتيجەلەرى بويىنشا ءتيىستى شەشىم قابىلداناتىن بولادى.

ىشكى ىستەر ورگانى قابىلداعان بۇل شەشىممەن دە كەلىسپەگەن جاعدايدا اۆتوكولىك يەسى سوتقا شاعىمدانا الادى.

«ۇيعارىمدارعا شاعىم جاساۋ ءتارتىبى اكىمشىلىك قۇقىقبۇزۋشىلىقتار تۋرالى كودەكستىڭ 43-1، 44-1 جانە 47-تاراۋلارىندا رەگلامەنتتەلگەن»، - دەدى اكىمشىلىك پوليتسيا كوميتەتىنەن.