قازالىدا كوشە بويىندا كىتاپحانا اشىلدى
قازالىلىقتار كوشە كىتاپحاناسى جوباسىن قولعا الدى. اۋدان اكىمى مۇرات ەرگەشبايەۆ جازۋشى ءابىش كەكىلبايەۆتىڭ «ادامدى ادام ەتكەن - كىتاپ، ادامزات ەتكەن - كىتاپحانا» دەگەن دانالىق ءسوزىن مىسالعا كەلتىرە وتىرىپ، كوشە كىتاپحاناسىنىڭ جۇمىسىنا ساتتىلىك تىلەدى. ونىڭ وسى شاراعا اكىم عانا ەمەس، وقىرمان، اۋدان تۇرعىنى رەتىندە قاتىسىپ، جاناشىرلىق تانىتۋى، وقىرماندارمەن ەركىن پىكىر الىسۋى، سۋرەتكە ءتۇسىپ، قاراپايىمدىلىق ءۇردىسىن ساقتاۋى دا كوپشىلىككە جىلى اسەر قالدىردى.
وبلىس كولەمىندە تۇڭعىش رەت ۇيىمداستىرىلىپ وتىرعان باستامانىڭ نەگىزگى ماقساتى كوپشىلىكتىڭ كىتاپ وقۋعا، كىتاپ الماسۋعا شاقىرۋ. سول ارقىلى ادامنىڭ جان دۇنيەسىن بايىتۋ، بىلىمگە داڭعىل جول اشۋ، جاڭا يدەيالارعا كىلت تابۋ، رۋحاني قۇندىلىقتارعا قول جەتكىزۋ بولىپ تابىلادى.
«الدەنەشە جەردە ورنالاسقان كوشە كىتاپحاناسى ارقىلى اۋدان تۇرعىندارى وزدەرى كۇتكەن قوعامدىق كولىك كەلگەنشە كىتاپتى وقۋعا نەمەسە وزىمەن بىرگە ۇناعان كىتابىن الىپ كەتۋىنە، كەيىن قايتارىپ بەرۋىنە، بولماسا وزگە كىتاپپەن اۋىستىرىپ وقۋعا مۇمكىندىگى بار. ءارى بۇل ءۇشىن ەشقانداي قۇجات تالاپ ەتىلمەيدى دە وقىرمان بيلەتى دە سۇرالمايدى. بارشاسى كىتاپ العان ادامنىڭ جاۋاپكەرشىلىگىنە بايلانىستى»، - دەيدى اۋدانداعى ورتالىقتاندىرىلعان كىتاپحانالار جۇيەسىنىڭ ديرەكتورى ينديرا نازاروۆا.
«كوشە كىتاپحاناسىنىڭ» اشىلۋ سالتاناتىندا تۇرعىنداردىڭ ءبىرى مۇڭسىزباي اۋباكىروۆ ءوزىنىڭ جەكە كىتاپحاناسىنان كىتاپ سىيعا تارتتى.
