اۋىر اتلەتتەردى جارىستان شەتتەتۋ مەرزىمى وسى ايدا اياقتالادى
وسىدان كەيىن ۇلتتىق قۇراماداعى اۋىر اتلەتتەرىمىز بۇرىنعىداي حالىقارالىق جارىستارعا قاتىسا الادى، دەپ حابارلايدى قازاقپارات ءتىلشىسى.
«اۋىر اتلەت يليا يلين مەن ءزۇلفيا چينشانلودا ديسكۆاليفيكاتسيا مەرزىمى 2 جىل بولعان ەدى. ولاردىڭ جارىسقا قاتىسا المايتىن مەرزىمى اياقتالىپ قويعانىن بىلەسىزدەر. ال ۇلتتىق قۇراما وسىدان ءبىر جىل بۇرىن ءبىر جىلدىق ديسكۆاليفيكاتسيا العان (دوپينگ داۋىنا بايلانىستى). وسى جىلدىڭ 20 -قازانىنان باستاپ حالىقارالىق اۋىر اتلەتيكا فەدەراتسياسى (IWF) ەنگىزگەن ءبىر جىلدىق ديسكۆاليفيكاتسيا جازاسى ۇلتتىق قۇرامامىزدان الىپ تاستالادى. وكىنىشكە قاراي، ۇلتتىق قۇراما ءبىر جىل بويى ەشقانداي حالىقارالىق سايىستارعا قاتىسا المادى. ەندى جازا مەرزىمى اياقتالعاننان كەيىن اۋىر اتلەتتەرىمىز اشحابادتا وتەتىن الەم چەمپيوناتىنا قاتىساتىن بولدى»، - دەپ حابارلادى قازاقستان اۋىر اتلەتيكا فەدەراتسياسىنىڭ (ق ا ا ف) باسپا ءسوز قىزمەتىنەن.
ءبىر جىل بۇرىن قازاقستان قۇراماسىمەن بىرگە رەسەي، قىتاي، ازەربايجان، ارمەنيا، بەلارۋس، مولداۆيا، تۇركيا، ۋكراينا ەلدەرىنىڭ ۇلتتىق قۇرامالارى ءبىر جىلدىق ديسكۆاليفيكاتسيا العان بولاتىن.
ايتا كەتسەك، اۋىر اتلەتيكادان الەم چەمپيوناتى بيىل اشحابادتا 1-10 -قاراشا ارالىعىندا وتەدى. ايتۋلى جارىسقا قازاقستان ۇلتتىق قۇراماسىنان كىمدەردىڭ قاتىساتىنىن حابارلاعان بولاتىنبىز.
سونىمەن بىرگە، حالىقارالىق اۋىر اتلەتيكا فەدەراتسياسىنىڭ وسى جىلدىڭ ماۋسىمىندا بەكىتكەن ەرەجەسىنە بايلانىستى شەشىمنىڭ شىققان- شىقپاعانىن ءبىلىپ كوردىك. ەستەرىڭىزگە سالا كەتسەك، IWF ەرەجەسىنە سايكەس، سپورتشىلارى دوپينگ داۋىنا ىلىككەن قازاقستان 2020 -جىلعى توكيو وليمپياداسىنا بار-جوعى 2 سپورتشىنى عانا (1 ەر، 1 ايەل سپورتشى) اپارا الادى. بۇعان كونگىسى كەلمەگەن قازاقستان اۋىر اتلەتيكا فەدەراتسياسى حالىقارالىق سپورتتىق اربيتراجعا (CAS) شاعىم تۇسىرگەن ەدى.
«ول شارۋا بويىنشا ءالى ناقتى شەشىم شىققان جوق»، - دەپ جاۋاپ بەردى فەدەراتسيادان.
