قىزدار ۋنيۆەرسيتەتىنىڭ عالىمدارى العاشقى ونەرتابىس پاتەنتىنە يە بولدى
يننوۆاتسيالىق ونەرتابىس نانوقۇرىلىمدى بەيورگانيكالىق ماتەريالدى سينتەزدەپ العانى ءۇشىن بەرىلىپ وتىر. بۇل تۋرالى وقۋ ورنىنىڭ ءباسپاسوز ورتالىعىنىڭ باسشىسى جاندار اسان حابارلادى.
ونىڭ ايتۋىنشا، حيميا عىلىمدارىنىڭ دوكتورى، پروفەسسور مۇحامەتقالي ماتايەۆتىڭ جەتەكشىلىگىمەن قىزدار ۋنيۆەرسيتەتىنىڭ ءبىر توپ عالىمى بىرنەشە جىلدان بەرى جاراتىلىس تانۋ فاكۋلتەتىنىڭ بازاسىنداعى كەشەندى حيميا- بيولوگيالىق عىلىمي- زەرتتەۋ ورتالىعىندا تاجىريبە جۇرگىزىپ كەلەدى. ۇزاق جىلعى عىلىمي ىزدەنىستىڭ ناتيجەسىندە ولار كۇن ەنەرگياسىن تۇرلەندىرۋ قۇرىلعىلارىنا ماگنيتتىك جارتىلاي وتكىزگىش ماتەريالى رەتىندە، سپينترونيكا، ميكروەلەكترونيكا جانە كومپيۋتەرلىك تەحنيكا قۇرىلعىلارىنا ماتەريال رەتىندە قولدانىلا الاتىن ونەرتابىسقا قول جەتكىزىپ وتىر.
جاندار اساننىڭ اقپاراتىنا سۇيەنەر بولساق، بۇل - قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ العاشقى ونەرتابىس- يننوۆاتسيالىق پاتەنتى. وقۋ ورنىنىڭ كەشەندى حيميا- بيولوگيالىق عىلىمي- زەرتتەۋ ورتالىعى عىلىمي، قوعامدىق جانە باسقا دا عىلىممەن اينالىساتىن ۇيىمدارمەن بىرلەسە وتىرىپ، عىلىمي جوبالاردى دايىنداۋ جانە جۇزەگە اسىرۋ جۇمىستارىنا قاتىسادى.
ورتالىقتىڭ جۇمىس ىستەۋ باعىتى بويىنشا قىزمەتكەرلەرگە، ۋنيۆەرسيتەتتىڭ ءبىلىم الۋشىلارىنا قىزمەت كورسەتۋگە جوسپارلانعان. ورتالىقتىڭ عىلىمي- زەرتتەۋ جۇمىستارى حيميا جانە بيولوگيا كافەدرالارىنىڭ بىرنەشە عىلىمي باعىتتارىنا سايكەس جۇرگىزىلەدى.
اۆتور: مارلان جيەمباي
