قازاقستاننىڭ «التىن ەمەل» پاركىندە سيرەك كەزدەسەتىن قۇستار تابىلدى

استانا. قازاقپارات - «التىن ەمەل» ۇلتتىق تابيعي پاركىندە كەكىلىك، ۇلار، سونداي- اق ىلەسپە قاناتتىلار سياقتى جىرتقىش قۇستاردى ەسەپكە الۋ جۇرگىزىلدى.

  بۇل تۋرالى ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت فەيسبۋكتەگى پاراقشاسىندا جازدى، دەپ حابارلايدى قازاقپارات.

زوولوگيا ينستيتۋتىنىڭ كاسىبي ورنيتولوگ مامانى قورىقتان سيرەك كەزدەسەتىن قۇستاردى تاپتى.

«ۇلكەن قالقان تاۋلارىندا قۇز كەپتەرلەردىڭ ۇيالايتىن مەكەنى العاش رەت تىركەلدى. ەگەر بۇرىن قىزعىلت ءبىرقازاندار مەن سۇڭقىلداق اققۋلار كەزدەسكەن بولسا، قازىر بۇيرا ءبىرقازاندار مەن قيقىلداقتار تابىلدى. ولار قىزىل كىتاپقا ەنگەن قۇستار. بۇلار وسى ساياباقتاعى قۇستاردىڭ تىزىمىندە بولعانىمەن، ولاردى ينسپەكتورلار وتە سيرەك كەزدەستىرەتىن. قامىستىباس سۋاتىندا بىردەن 16 كۇشىگەن (حالىقارالىق قىزىل كىتاپقا ەنگەن) بەلگىلەندى. سونداي- اق، 8 قۇماي كەزدەسكەن. ايتا كەتكەن ءجون، بيىل مامىردا كىشى قالقان تاۋلارىنىڭ باۋرايىندا وتە سيرەك كەزدەسەتىن بالىقشى تۇيعىن تاعى دا كەزىككەن بولاتىن»، - دەدى ساكەن دىلداحمەت.

 «التىن ەمەل» - قازاقستان اۋماعىندا ىلە وزەنىنىڭ القابىندا ورنالاسقان ۇلتتىق تابيعي پاركى. قورىق 1996 -جىلى 10 - ساۋىردە اشىلعان.