تاجىكستان پرەزيدەنتى شەتەلدىك جۋرناليستەرگە قانداي سىيلىق بەردى

«بۇگىن مەن سىزدەر كەلەر الدىندا ارنايى تاپسىرما بەردىم. جۋرناليستەر، وپەراتورلار - بارلىق بۇقارالىق اقپارات قۇرالدارىنىڭ وكىلدەرىنە پرەزيدەنتتىڭ شاعىن سىيلىعى بەرىلەدى. ءاربىر جۋرناليست الادى. ىشىندە كەپتىرىلگەن جەمىستەر، «تورپەدو» دەيتىن قاۋىن جانە گرانات بار. بولا ما؟ بولادى دەپ ويلايمىن. سىزدەرگە كوپ راقمەت!»، - دەدى ە. راحمون.

ايتا كەتەيىك، بۇگىن تاجىكستان استاناسى - دۋشانبە قالاسىندا تمد مەملەكەت باسشىلارى كەڭەسىنىڭ كەزەكتى سامميتى ءوتتى. وعان ق ر پرەزيدەنتى نۇرسۇلتان نازاربايەۆ تا قاتىستى. سامميتتىڭ قورىتىندىسى بويىنشا ءبىرقاتار قۇجاتتارعا قول قويىلدى. سونىڭ ىشىندە عارىشتى بىرلەسىپ يگەرۋگە قاتىستى كەلىسىم دە بار.

«قازاقپارات» اگەنتتىگى ت م د باستى ورگانى - پرەزيدەنتتەر كەڭەسىنىڭ كەزەكتى وتىرىسى الدىندا بۇعان دەيىنگى جيىندارعا شولۋ جاساپ، قابىلدانعان شەشىمدەردى پىسىقتاپ شىققان بولاتىن. ال اقوردانىڭ باسپا ءسوز قىزمەتى تاريحي ماڭىزى بار فوتوسۋرەتتەردى ۇسىندى.

اۆتور: ارمان اسقاروۆ