يندونەزيادا جەر سىلكىنىسىنەن كەيىن جۇزدەن استام ادام تۇرمەدەن قاشتى
پاۋلۋ قالاسىندا جەراستى دۇمپۋلەرى باستالعان كەزدە سوتتالعاندار تۇرمە باسشىلىعىنان وزدەرىن بوستاندىققا جىبەرۋدى سۇراعان. قالاۋلارى ورىندالماعاننان كەيىن 340 ادام بۇلىك شىعارىپ، تۇرمەگە وت قويعان. كولونياعا دەرەۋ پوليتسيا قىزمەتكەرلەرى جەتكەن. ءبىراق جاعدايدى تولىعىمەن باقىلاۋعا الۋ مۇمكىن بولماعان. سوتتالعانداردىڭ ءبىرقاتارى قاشىپ ۇلگەرگەن.
تۇرمەدە ءالى دە جۇزدەگەن ادام بار. ءبىراق كۇزەت قىزمەتى ولاردى ارەڭ باقىلاۋدا ۇستاپ وتىر. سەبەبى كولونيا عيماراتى ءزىلزالا مەن ورتتەن قاتتى زارداپ شەككەن.
ەسكە سالايىق، جۇما، 28 - قىركۇيەك كۇنى پاۋلۋ قالاسىنا جاقىن ورنالاسقان سۋلاۆەسي ارالىندا 6,1 جانە 7,4 ماگنيتۋداسىمەن ەكى جەر سىلكىنىسى بولدى. قۋاتتى جەراستى دۇمپۋلەرى بيىكتىگى ەكى مەتردەن اسقان سۋناميدىڭ تۋىنداۋىنا اكەپ سوقتىردى. سوڭعى مالىمەتتەر بويىنشا، 832 ادام قازا بولدى. بۇعان دەيىن اجال قۇشقان 420 ادام تۋرالى ايتىلعان ەدى. ەل ۇكىمەتى بۇل سان ءالى دە ارتۋى مۇمكىندىگىن جوققا شىعارمايدى.
بۇعان دەيىن حابارلاعانىمىزداي، ەكى كۇننەن بەرى سۋلاۆەسي ارالىن استان- كەستەڭ ەتكەن تابيعي اپاتتان قازا تاپقاندار اراسىندا قازاقستاندىقتار جوق.
مەملەكەت باسشىسى نۇرسۇلتان نازاربايەۆ يندونەزيا پرەزيدەنتى دجوكو ۆيدودوعا كوڭىل ايتۋ جەدەلحاتىن جولدادى.
