دارحان كالەتايەۆ الماتىدان قىتايعا دەيىنگى جاڭا ۆەلوتۋر تۋرالى ايتتى
بۇگىن الماتىدا «الماتى تۋرى 2018» ەكىكۇندىك ۆەلوجارىسى اياقتالدى. جەڭىمپازداردى ماراپاتتاۋ راسىمىنە قاتىسقان ق ر ۆەلوسپورت فەدەراتسياسىنىڭ پرەزيدەنتى دارحان كالەتايەۆ تۋردىڭ ناتيجەسى مەن الداعى جوسپارلار تۋرالى ايتتى.
«الماتى تۋرى» وسىمەن التىنشى رەت ءوتىپ وتىر. ايتارلىقتاي تاجىريبە جينالدى. «الماتى تۋرى» الەم كۇنتىزبەسىندە ءوزىنىڭ لايىقتى ورنىن الىپ ۇلگەردى. ءبىزدى حالىقارالىق ۆەلوسيپەدشىلەر وداعى بەلسەندى قولداپ كەلەدى. بۇگىنگى دودا - ورتالىق ازياداعى ەڭ ءىرى جارىستاردىڭ ءبىرى. بيىلعى وزگەرىس - مارشرۋتتى الماتىلىقتاردىڭ مادەني ءارى تاريحي ورىندارى بار باستى داڭعىلداردىڭ بويىنا قۇردىق. تەلەكارتينا ارقىلى وڭتۇستىك استانامىزدىڭ سۇلۋلىعىن بۇكىل الەمگە پاش ەتتىك. جارىسقا التى جىل كوپ سەكىلدى كورىنۋى دە مۇمكىن، ءبىراق بۇل تەك باستاۋى. تاعى ءبىر جوسپارىمىزدى ايتا وتىرايىن. قىتاي ۆەلوسپورت فەدەراتسياسىمەن كەلىسسوز جۇرگىزىپ جاتىرمىز. «الماتى تۋرى» مەن «قىتاي تۋرىن» بىرىكتىرەۋ مۇمكىندىگىن كوپ ۋاقىتتان بەرى تالقىلاپ كەلەمىز»، - دەپ كەلتىرەدى دارحان كالەتايەۆتىڭ سوزدەرىن فەدەراتسيا.
ونىڭ ايتۋىنشا، الماتى- قىتاي كوپكۇندىك جارىسىن «جىبەك جولى تۋرى» دەپ اتاپ كوزدەلۋدە.
«وزىندىك ءبىر «جىبەك جولى تۋرىن» جاساعىمىز كەلەدى. سورەسى الماتىدا، ال مارەسى قىتايدىڭ بەلگىلى ءبىر قالاسىندا بولسا - بۇل الەمدىك ۆەلوسپورت ماسشتابىنداعى وتە ءىرى سپورت وقيعاسى بولار ەدى. وزدەرىڭىز دە بىلەسىزدەر، قازىرگى ەڭ ءىرى گراند- تۋرلار ەۋروپادا وتەدى - «تۋر دە فرانس»، «ۆۋەلتا» جانە «دجيرو ديتاليا». ازيا ءوز جەرىندە ءتورتىنشى ءىرى كوپ كۇندىك ەۆانت وتكىزۋگە لايىق بولعان شىعار. ءبىزدىڭ ماقسات - ۇلكەن ازيا تۋرىن وتكىزۋ، «الماتى تۋرى» - ونىڭ باستاۋى»، - دەدى ول.
بۇعان دەيىن حابارلاعانىمىزداي، «الماتى تۋرى 2018» ۆەلوجارىسىنا ءار ەلدەن كەلگەن 19 كوماندا قاتىستى. ەكى كەزەڭنەن وتكەن دودانىڭ العاشقى كۇنى «Astana Pro Team» كومانداسىنىڭ مۇشەسى داۆيدە ۆيللەلا جەڭىسكە جەتسە، بۇگىن اتالمىش كوماندانىڭ تاعى ءبىر وكىلى لۋيس لەون سانچەس ۇزدىك اتاندى.
