پاۆلودار وبلىسىندا تەمىرعالى نۇرەكەننىڭ كەسەنەسى بوي كوتەردى

None
None
پاۆلودار. قازاقپارات - پاۆلودار وبلىسىنىڭ ەسىلباي اۋىلىندا قوعام قايراتكەرى تەمىرعالى نۇرەكەنگە كەسەنە تۇرعىزىلدى، دەپ حابارلايدى قازاقپارات pavlodarnews.kz سايتىنا سىلتەمە جاساپ.

 تەمىرعالى نۇرەكەن كەسەنەسىنىڭ اشىلۋىنا ارنالعان شاراعا 700-دەن استام ادام جينالدى. يسلام ءدىنىن تاراتقان بەلگىلى تۇلعانىڭ ءومىرىن «رۋحاني جاڭعىرۋ» باعدارلاماسى اياسىندا زەرتتەۋ تۋرالى ۇسىنىستى شارباقتى اۋدانىنىڭ اكىمى بالعاباي ىبىرايەۆ بىلدىرگەن. ناتيجەسىندە مۇراعات ماتەريالدارى مەن تاريحي سۋرەتتەر، ونىڭ ۇرپاقتارى تۋرالى مالىمەتتەر تابىلعان. تەمىرعالى نۇرەكەن XIX عاسىرداعى قوعام قايراتكەرى، سەمەي وبلىسى پاۆلودار ۋەزىنىڭ سەيتەن بولىسىن باسقارعان. 1905 -جىلى قارقارالى، پاۆلودار ۋەزى قازاقتارىنىڭ اتىنان ىشكى ىستەر مينيسترلىگىنە نارازىلىق ءبىلدىرىپ، پەتيتسيا جازۋعا قاتىسقان. پەتيتسيانى قازاق تىلىنەن ورىس تىلىنە اۋدارعان. 1907 -جىلى ەكىنشى مەملەكەتتىك دۋماعا سەمەي وبلىسىنان دەپۋتات بولىپ سايلانىپ، مۇسىلمان فراكتسياسىنىڭ مۇشەسى بولعان. ءومىرىن اعارتۋشىلىققا ارناعان جان مەشىت پەن مەكتەپ اشقان. 1992 -جىلى ەسىلباي اۋىلىنىڭ تۇرعىندارى مەشىت تۇرعىزىپ، وعان تەمىرعالى نۇرەكەننىڭ ەسىمىن بەرگەن.



اۋداندىق ىشكى ساياسات ءبولىمىنىڭ باسشىسى سەرجان يمانقۇلوۆتىڭ ايتۋىنشا، كەسەنەنىڭ قۇرىلىسى تۋرالى وي وبلىستىق قوعامدىق كەڭەستە ايتىلعان.

 «رۋحاني جاڭعىرۋ» باعدارلاماسى اياسىندا وسىعان ۇقساس جوبالاردى جۇزەگە اسىرۋ ماقساتىندا ۇسىنىس ماقۇلدانىپ، «شارباقتى - تۋعان جەر» اتتى قوعامدىق قورىن قۇرۋ تۋرالى ورتاق شەشىم قابىلداندى. قورعا شەگەرەن اۋىلدىق وكرۋگىنىڭ تۇرعىندارى، مەكەمە- ۇيىمداردىڭ قىزمەتكەرلەرى قارجى اۋداردى. مازاردى تۇرعىزۋ جوباسىن وبلىستىق ساراپتاۋ كوميسسياسى بەكىتىپ، وبلىس اكىمى بولات باقاۋوۆ ماقۇلداندى»، - دەيدى سەرجان يمانقۇلوۆ.



جوبانى جۇزەگە اسىرۋ تامىز ايىندا باستالدى. شاراعا ايماق باسشىسى بولات باقاۋوۆ، وبلىس جانە اۋداننىڭ قۇرمەتتى ازاماتتارى: عاريفوللا ەسىم، وپەرا ءانشىسى شاحيماردان ءابىلوۆ، تەمىرعالى نۇرەكەننىڭ ۇرپاقتارى، دەمەۋشىلەر مەن جەرگىلىكتى تۇرعىندار قاتىستى.



«1992 -جىلدان بەرى ەسىلباي اۋىلىندا مەشىت اشىلعالى بەرى وسىندا كەلە باستادىم. 1937 -جىلى 150 ورىنعا ارنالعان مەشىت جابىلىپ قالعان. 1992 -جىلى اتام تۋرالى ماتەريالدار ىزدەي باستادىم. ماسكەۋدە ونىڭ كىتاپتارى مەن سۋرەتتەرىن تاۋىپ الىپ، بارلىق قۇجاتتاردى وبلىستىق ولكەتانۋ مۇراجايىنا تاپسىردىم. ءبىزدىڭ بولاشاق ۇرپاق ءوزىنىڭ تۋعان جەرىنىڭ تاريحىن ءبىلۋ كەرەك»، - دەيدى شوبەرەسى كامال بەكتۇروۆا.



نىساننىڭ اشىلۋىنا وراي ەسىلباي اۋىلىندا ون ءبىر كيىز ءۇي تىگىلدى، دۇعا وقىلىپ، اس بەرىلدى. سونداي- اق شارا بارىسىندا ۇلتتىق ويىنداردان جارىستار ۇيىمداستىرىلدى.

سوڭعى جاڭالىقتار