قازاقستاننىڭ ۇزدىك قولونەر شەبەرلەرى ماراپاتتالدى
بايقاۋ وسىمەن 10 جىل بويى وتكىزىلىپ كەلەدى. بيىل وعان 76 ءوتىنىم تاپسىرىلىپ، ولاردىڭ 27- ءسى فينالعا شىقتى. جۇمىستاردىڭ باسىم بولىگىن تۇركىستان، شىمكەنت، قوستاناي، قىزىلوردا، اتىراۋ، الماتى، تاراز جانە قاپشاعاي وڭىرلەرىنىڭ جاس شەبەرلەرى جولداعان.
«رەسپۋبليكالىق بايقاۋعا قاتىسۋ شەبەرلەردىڭ ونەرپازدىقتارىن دامىتۋعا ىنتالاندىرا وتىرىپ، ءوزىنىڭ قولدانبالى ونەر بۇيىمدارىنا ءداستۇرلى سارىن مەن ەجەلگى تەحنيكامەن بىرگە زاماناۋي بىرەگەي شەشىم مەن ءوزىنىڭ جەكە اۆتورلىق ءستيلىن، دۇنيەتانىمىن قوسۋعا مۇمكىندىك بەرەدى»، - دەيدى بايقاۋ ۇيىمداستىرۋشىسى ايجان بەكقۇلوۆا.
جۇمىستاردى ونەرتانۋشىلار، سۋرەتشىلەر مەن بيزنەس وكىلدەرىنەن قۇرالعان ساراپتاما كوميسسياسى باعالادى. قازىلار القاسىنىڭ قۇرامىندا، سونداي- اق حالىقارالىق ساراپشى - بەلگىلى زەرگەر مارتينا دەمپف (گەرمانيا) بولدى.
جەڭىمپازدار بىرنەشە نوميناتسيا بويىنشا انىقتالدى: «جوعارى شەبەرلىك» - كوكەنوۆ سەرىكقالي، كازاكوۆ يليا، «جوعارى ساپا» - يۋلدابايەۆ رافايل، «جاڭاشىلدىق» - جىلىبايەۆا كۇندىز، شاپابايەۆ قايرات، «دارىندى باستاۋ» - لاحان نۇرجان، ءاشىموۆ دياس، «ءتولتۋما» - بەيسبەكوۆ بەرىك، «ۇلتتىق مادەني برەند» - ايدارشا مەرەكە، «قازاقستاندىق ۇلتتىق كادەسىي» - قاپ قىزى تامارا، رىسبايەۆ ابايحان.
ال 2018 -جىلدىڭ «ۇزدىك شەبەرى» ماراپاتىن تۇردىعۇلوۆ جولاۋشى يەلەندى.
