پرەزيدەنت تۇركىستاننىڭ باس جوسپارىن بەكىتتى

تۇركىستان. قازاقپارات - ق ر پرەزيدەنتى نۇرسۇلتان نازاربايەۆ تۇركىستان قالاسىن دامىتۋ بويىنشا كەڭەس وتكىزدى. وعان وتاندىق كاسىپكەرلەر شاقىرىلدى.

سول جەردە ق ر پرەمەر- ءمينيسترىنىڭ ءبىرىنشى ورىنباسارى اسقار مامين مەملەكەت باسشىسىنا قالانى دامىتۋ جوسپارىن تانىستىردى، دەپ حابارلايدى قازاقپارات ءتىلشىسى.

«تۇركىستان قالاسىنىڭ باس جوسپارىن ازىرلەۋگە قاتىستى حالىقارالىق كونكۋرس ۇيىمداستىرىلدى. 22 ۇسىنىستىڭ ىشىنەن ۇزدىك جوبا تاڭدالدى. قۇرمەتتى نۇرسۇلتان ءابىش ۇلى، اتالعان جوبا ءسىزدىڭ تاپسىرماڭىزدا قويىلعان تالاپتارعا تولىعىمەن سايكەس كەلەدى. سونىڭ ىشىندە تۇركىستاننىڭ تاريحي قۇندىلىقتارىن ساقتاۋ، ودان ارى كوركەيتۋ، قوجا احمەت ياسساۋي كەسەنەسى نەگىزىندە مادەني- رۋحاني ورتالىقتى ساقتاۋ جانە اكىمشىلىك- ىسكەرلىك ورتالىقتى قۇرۋعا ەرەكشە كوڭىل ءبولىندى» ، - دەدى ا. مامين.

ۆيتسە- پرەمەردىڭ ايتۋىنشا، قازىرگى كەزدە قالانىڭ اۋماعى -  9700 گەكتار، حالىقتىڭ سانى -  162000 ادام. باس جوسپارعا سايكەس، قالا اۋماعى  22000 گەكتارعا دەيىن كەڭەيەدى. حالىقتىڭ سانى 2035 -جىلى  350000, ال 2050 -جىلى  500000 ادامعا دەيىن وسەدى دەگەن بولجام بار.

«الدىمەن 25 گەكتارعا ينجەنەرلىك كوممۋنيكاتسيالار تارتىلادى. ول جەردە وبلىس اكىمدىگى مەن ونىڭ مەكەمەلەرى، مەملەكەتتىك ورگانداردىڭ اۋماقتىق بولىمشەلەرى، كونگرەسس ورتالىعى جانە «تۇركىستان باس جوسپارى» مەكەمەسى ورنالاسادى. ال تۇركى الەمىنىڭ مادەني جانە رۋحاني ورتالىعىنىڭ جالپى اۋدانى  2211 گەكتاردى قۇرايدى. ءبىرىنشىسى - قوجا احمەت ياسساۋي كەسەنەسى اينالاسىنداعى 89 گەكتار، ەكىنشىسى - قۇرىلىس سالۋدى رەتتەۋ ايماعىنىڭ 98 گەكتارى، سونىڭ ىشىندە قوجا احمەت ياسساۋي كەسەنەسى كىرەبەرىس ايماعىن قالپىنا كەلتىرۋ، ءۇشىنشى جانە ءتورتىنشى - تاريحي كوشەلەر مەن تاريحي ورامداردى قالپىنا كەلتىرۋ ايماعى، بەسىنشى -  1400 گەكتاردى قۇرايتىن ساياباق ايماعى، ول جەردە دەمالىس جانە تۇركى مادەنيەتىمەن تانىسۋ ايماعى بولادى» ، - دەپ اتاپ كورسەتتى ا. مامين.

2019-2021 -جىلدار ارالىعىندا  10000 پاتەردى پايدالانۋعا بەرۋ جوسپارلانىپ وتىر. ال قالا حالقىنىڭ وسۋىنە بايلانىستى «كەنتاۋ- تۇركىستان» سۋ ماگيسترالىنىڭ ەكىنشى جەلىسى سالىنادى. بۇدان بولەك، حالىقارالىق اۋەجاي مەن اۆتوۆوكزال تۇرعىزىلادى. الداعى ۋاقىتتا جاڭا تەمىرجول ۆوكزالىنىڭ قۇرىلىسى دا قارالادى.

«تۇركىستان قالاسىنا ينۆەستيتسيا تارتۋ جانە قولايلى ينۆەستيتسيالىق كليمات جاساۋ ماقساتىندا ارنايى ەكونوميكالىق ايماقتى قۇرۋدى ۇسىنامىز. ال ايماقارالىق ساۋدانى دامىتۋ ماقساتىندا ۇكىمەت قازاقستان مەن وزبەكستاننىڭ شەكاراسىندا حالىقارالىق ساۋدا ورتالىعىن اشۋدى ۇسىنىپ وتىر» ، - دەدى ا. مامين.

 كەڭەستىڭ سوڭىندا مەملەكەت باسشىسى تۇركىستان قالاسىنىڭ باس جوسپارىنا قاتىستى جارلىققا قول قويدى. ارنايى ەكونوميكالىق ايماقتى قۇرۋ تۋرالى قۇجات تا بولەك راسىمدەلدى.