نۇرسۇلتان نازاربايەۆ تۇركىستاندى ىلگەرىلەتۋ ىسىندە تۇرعىندارعا تابىس تىلەدى
ەلباسى قالا تۇرعىندارى الدىندا سويلەگەن سوزىندە جاڭا تۇركىستان وبلىسىن قۇرۋدىڭ جانە ءوڭىر ورتالىعىن تۇركىستان قالاسىنا كوشىرۋدىڭ تاريحي ءارى الەۋمەتتىك- ەكونوميكالىق مانىنە توقتالدى.
«تۇركىستاننىڭ حالقىمىز ءۇشىن ايرىقشا ماڭىزى بار. بۇل - ورتالىق ازياداعى ەجەلگى قالالاردىڭ ءبىرى. 2000 -جىلى تۇركىستاننىڭ 1500 جىلدىعىن يۋنەسكو دەڭگەيىندە اتاپ وتتىك» ، - دەدى قازاقستان پرەزيدەنتى.
نۇرسۇلتان نازاربايەۆ ورتا ازيا اۋماعىنا يسلام ءدىنىن تاراتۋ ۇدەرىسىندەگى تۇركىستاننىڭ ءرولى جونىندە اڭگىمەلەدى.
سونداي- اق، مەملەكەت باسشىسى قاسيەتتى تۇركىستان توپىراعىندا قازاق حالقىنىڭ ۇلى تۇلعالارى مەن يگى جاقسىلارى جەرلەنگەنىن ايتتى.
«تاريحىمىزدىڭ قيلى كەزەڭدەرىندە مۇندا بۇكىل ۇلتىمىزدىڭ بولاشاعىنا قاتىستى ماڭىزدى شەشىمدەر قابىلدانعان. تۇركىستاندا حالقىمىزدىڭ كوپتەگەن بەلگىلى تۇلعالارى جەرلەنگەن. جالپى، قالا تاريحى - بارشا قازاقتىڭ تاريحى، - دەدى قازاقستان پرەزيدەنتى.
نۇرسۇلتان نازاربايەۆ تۇركىستاننىڭ كۇللى تۇركى حالىقتارىنىڭ ومىرىندە دە ەرەكشە ورىن الاتىنىن اتاپ ءوتتى.
مەملەكەت باسشىسى قابىلدانعان شارالاردى جۇزەگە اسىرۋ ناتيجەسىندە قالا كەلبەتى تەز ارادا ايتارلىقتاي وزگەرەتىنىنە، شاھار ءوزىنىڭ وركەندەۋ جولىندا جاڭا بيىكتەردى باعىندىراتىنىنا سەنىم ءبىلدىردى.
سوڭىندا ەلباسى تۇركىستاندى ىلگەرىلەتۋ ىسىندە بارشا تۇرعىندارعا تابىس تىلەدى.
